Veður, veður, veður, veður verður alltaf atriði

Hvað skyldi ég oft hafa heyrt fólk bulla því út úr sér að veður skipti ekki máli, heldur hvernig fólk klæðir sig? Oft!

Ég hef aldrei verið sammála. Er það ekki og verð það ekki.

Undanfarið hef ég mikið umgengist útlendinga sem hafa velt fyrir sér hvernig þeir geti sem best nýtt sér frítíma sinn á Íslandi. Það fyrsta sem þeir hafa spurt um er veðurspáin. Sumir létu rigningarspá fæla sig frá tilteknum ferðum.

Þetta er kannski ekki til fyrirmyndar en svona er fólk samt. Og nú skal ég bara æsa mig næst þegar einhver fullyrðir þetta í mín eyru.

Veður er nokkuð sem við getum ekki haft áhrif á. Veður er náttúra og sumir heillast vissulega af tilhugsuninni um vind sem rífur í jakkana. Ég man sérstaklega eftir einum Hollendingi í Mývatnssveitinni endur fyrir löngu sem stóð uppi á hól og naut þess að geta varla staðið. Heima hjá honum var hitabylgja það sumarið.

Nei, veður er óútreiknanlegt. Margt annað á Íslandi er hins vegar útreiknanlegt. Og ég er næstum viss um að ég heyrði í útvarpinu í morgun vitnað í Börk vin minn Hrólfsson sem talaði um að salernismál yrðu hneykslið í sumar. Ég tek undir það, hafi salernunum við Dettifoss verið lokað og fólki gert að hægja sér á víðavangi er það SKANDALL. Útreiknanlegur skandall - sorglegt og alveg örugglega eitthvað sem margir nefna þegar þeir koma heim.

Ég sá líka nýlega mynd frá Geysi þar sem fólk stóð næstum ofan í skálinni við að taka myndir. Auðvitað sé ég þetta ekki á staðnum því að ég myndi banna fólki það. ÞAÐ ER HÆTTULEGT en fólk fær ekki að vita það. Hvorki eru afgerandi skilti á staðnum né fólk sem veit og segir frá.

Ein vinkona mín á ferðaskrifstofu sagði nýlega í mín eyru: Ef ég væri nýr ferðamálastjóri á Íslandi er þetta það fyrsta sem ég léti breyta því að nú er bara tímaspursmál hvenær einhver slasast alvarlega.

Við viljum fjölga ferðamönnum á Íslandi en bara ekkert hafa fyrir þeim.

-Garg.

Athugasemdir

[Laufa drottning (IP-tala skráð) 14.7.2008 kl. 11:31]

Er ekki óþarfi að gera veður út af veðri? Geri frekar veður út af verði.

[Berglind Steinsdóttir, 14.7.2008 kl. 15:05]

Neibb, ekki óþarfi. Líka ástæða til að gera veður út af verði, alltént verði á sambærilegri vöru milli landa. Og augljóslega er líka ástæða til að gera veður út af KLÓSETTUM. Ef fólk fær ekki að skíta í einrúmi ... getur fokið undan því.

Er ekki drottningin sammála?

[Þórður Ingi Bjarnason, 14.7.2008 kl. 18:02]

Það er eitt sem íslendingar meiga ekki láta fara í taugarnar á sér er veðrið.  Veður skiptir miklu máli í ferðalögum og þegar er leiðinlegt veður þá verður fólk oft fúlt. 

Þó að það sé rigning þá er hægt að gera nánast hvað sem er þó svo að alltaf sé betra þegar þurft er.  þetta byggist á hugafari fólks,  ef við látum veðrið fara í taugarnar á okkur þá verður allt ómguðlegt þegar veðrið er ekki eins og við hefðum viljað hafa það.

En ég hef oft sagt og stend við það að það er aldrei vont veður heldur illa klætt fólk. 

[Berglind Steinsdóttir, 14.7.2008 kl. 18:04]

Þórður, ég er þá bara 100% ósammála þér og sannreyndi á mjög mörgum í síðustu viku að veður skiptir fólk mjög miklu máli. Fólk reynir hins vegar að gera gott úr, það er allt annað mál.

[Þórður Ingi Bjarnason, 14.7.2008 kl. 18:40]

Berglind, Ég sagði líka að veðrið skipti miklu máli en við meigum ekki láta það fara í skapið á okkur heldur að gera gott úr hlutunum og klæða sig eftir veðri. 

[Sóla (IP-tala skráð) 15.7.2008 kl. 20:34]

Hæ Berglind!

Getur þú ekki sent inn á Babel síðuna?

Viltu prófa að auglýsa fyrir mig eftir bókunum sem eru kenndar í Þýðingafræðikúrsinu, þær heita Translation Scandals og Introduction to translation studies.

Bestu kveðjur og þakkir  Sóla [e-mail]

[Berglind Steinsdóttir, 15.7.2008 kl. 21:31]

Búin! Ég kannast ekki við skandalabókina en bækurnar mínar eru útistandandi þannig að ég get því miður ekki boðið þær fram.