Með þyrlu á Langjökul?

Í dag var ég beðin um að vera leiðsögumaður Breta um helgina. Því miður var ég búin að ráðstafa tíma mínum, annars hefði ég farið á laugardaginn í mitt fyrsta þyrluflug. Svolítið skondið eftir mörg ár í hvataferðum að hafa bara farið tvisvar eða þrisvar í flúðasiglingu og ALDREI tekist á loft. Í þyrlu.

Ég hefði auðvitað hringt beint í Ólól til að fá tilsögn í hvernig ég ætti að bera mig. En það reynir sum sé ekki á.

Flug í leggjum

Ég er með mikil innkaup á flugmiðum í vinnslu - þekkir einhver þá reglu að flug til t.d.  London sé hlutfallslega ódýrara ef maður kaupir báðar leiðir í sama pakka? Getur miðinn út kostað 20.000 og heim 20.000 en samtals 34.000 ef maður kaupir báða leggi í einu? Skiptir máli hvort maður kaupir flugið heima eða í útlandinu?

Er fáokun??

Vaxtaákvörðunardagur á fimmtudaginn

Ég spáði því í gær að stýrivextir færu ofan í 5% fimmtudaginn 19. mars. Ég ætla að standa við þá spá. Alþjóðagjaldeyrissjóðurinn var kátur þegar hann kvaddi landann í gær. Og hjá mér er þetta valkvæð bjartsýni, vextirnir verða að húrra niður.

Sem smásparifjáreigandi vil ég líka að vextirnir lækki. Mér finnst fráleitt að verðtryggð innistæðan hækki óeðlilega og atvinnulífið fái ekki nauðsynlegt lánsfé til að halda sjálfu sér rúllandi. Ef atvinnulífið hægir meira á sér bitnar það líka á mér. Gefur augaleið að allir tapa með sama áframhaldi.

Allra hagur að lækka stýrivexti og bankavexti auðvitað í framhaldinu, inn og út. Niður í 5%, takk.

Kranar blaðanna - 8% af hverju?

Hvað ætlar HB Grandi að gera? Ætlar hann virkilega og í fúlustu alvöru að greiða arð til hluthafa á sama tíma og hann kemur sér hjá því að standa við gerða samninga?

Eyjan, Mogginn og Bæjarins besta spyrja engra spurninga, ekki hvort raunverulegur hagnaður hafi orðið, ekki hvert eigið fé er og ekki einu sinni af hvaða upphæð eigi að greiða 8% hagnað. Hverjar eru arðgreiðslurnar? Hvernig eru þær til komnar? Hafa stjórnendur ekki einu sinni viðskiptavit? Það þarf engan meðalhálfvita til að sjá að þetta muni hleypa illu blóði í fólk. Og Vilhjálmur Birgisson virðist einn af fáum verkalýðsforkólfum sem stendur með fólkinu sínu þannig að varla kemur HB Granda á óvart að hann hafi opnað munninn.

En hvað er að þessum fréttaflytjendum? Líklega hefur Jónas 100% rétt fyrir sér þegar hann talar um kranablaðamennsku. Og það merkilegasta er að þrátt fyrir umræðuna um og gagnrýnina á fjölmiðla hafa þeir ekki tekið sig á í raun. Í fljótu bragði virðist þó Vísir horfa á fréttatilkynningu gagnrýnum augum:

Stjórn HB Granda leggur til að hluthöfum verði greiddur arður, sem myndi duga til að greiða öllu fiskvinnslufólki félagsins launahækkun, sem tekin var af því um mánaðamótin, í átta ár. Stjórnarmenn í HB Granda eru einnig stærstu eigendur fyrirtækisins, sem skilaði ríflega tveggja milljarða hagnaði í fyrra.

...

Það eru um sex hundruð hluthafar í Granda, en örfáir aðilar eiga þar stærstan hlut, eða Vogun hf með 41 prósent, sem er aftur í eigu Árna Vilhjálmssonar stjórnarformanns HB Grands og Kristjáns Loftssonar stjórnarmanns í HB Granda. Annar stjórnarmaður er svo Ólafur Ólafsson en Kjalar hf, félag hans, á 33 prósent í HB Granda. Stjórnarmenn eru því að ákveða sjálfum sér arð.

Vilhjálmur Birgirsson segir að fyrir arðgreiðsluna mætti greiða öllu fiskvinnslufólki HB Granda launahækkunina sem það fékk ekki í þessum mánuði eins og til stóð næstu átta árin.

Gat verið að Ólafur Ólafsson skyti upp kollinum í von um ósanngjarnan gróða. HFF.

Lýðræðisdaginn lengir

Ég man hvar ég var þegar ég heyrði að nýr formaður hefði verið kosinn í VR. Ég skeiðaði eftir Vesturgötunni og hlustaði á útvarpsfréttir í símanum mínum. Ég var svo illa áttuð að ég var ekki með á hreinu að kosningunni væri að ljúka (er ekki í VR þannig að mér fyrirgefst) en ég æpti af gleði. Ungur maður hinum megin við götuna hrökk við og dreif sig á Rauðhettu og úlfinn í klippingu.

Ég viðurkenni að ég þekki hvorki Kristin né Lúðvík, hinn nýja frambjóðandann sem þó var ekki kosinn. Eymingja Gunnar Páll er bara fulltrúi svo gamalla og þreyttra gilda, svo mikið 2007, að hann varð að taka pokann sinn. Sem léttastan.

Og ekki spillti fyrir að hinn ötuli Ragnar sem hefur kafað djúpt ofan í lífeyrismálin var kosinn í stjórnina.

Undir kvöld var dagurinn þannig orðinn góður.

Svo fór ég á borgarafund í Iðnó og vel að trúa því að pallbyrðingar ætli að gera allt sitt til að ná til baka milljörðunum úr skálkaskjólunum. Réttlæti, takk.

Allt á réttri leið.

Rauð paprika - kílóverð

Ekki veit ég hvort rauð paprika er í matarkörfunni sem er notuð í almennum útreikningum á matarkörfu landsmanna. Hitt veit ég að rauð paprika virðist vera tíður gestur í matarkörfunni minni. Til gamans fór ég í gegnum strimlana yfir matarinnkaup síðan í október og mér til mikillar furðu komst ég að því að verð á rauðri papriku er afskaplega rokkandi, mest allt í kringum 400 kr. á kílóið - upp í 598 kr. Það merkilega var að hún var dýrust í október - í Bónus - á 598 kr. Lægsta verðið, hvað? Það var líka um svipað leyti og Guðmundur í Bónus hvatti landsmenn til að hamstra þar sem hann sæi fram á vöruskort. Þarf ég að orðlengja þetta?

Ég er ágætlega verðmeðvituð en greinilega dálítið löt að skoða kílóverð og það þori ég að hengja mig upp á að kaupmennirnir vita mætavel. Annað sem ég kaupi gjarnan er mangó og það verð er líka eins og þeytispjald. Næst þegar ég nenni að skoða verðstrimlana ætla ég að skoða tímasetningar - er verð hærra síðla dags?

Bankinn þinn?

Hvaða banka munar um 107 milljarða? Hvaða banki hótar núna að ganga að húseignum útlenskra viðskiptavina sinna í Lúxemborg? Hvaða banki lánar eða gefur eða gleymir 500 milljörðum? Hvað kemur þetta okkur við ...?

Opinn borgarafundur í Iðnó á miðvikudagskvöld kl. 20. Frummælendur verða þingmennirnir Atli Gíslason og Bjarni Benediktsson og svo Björn Þorri Viktorsson, hæstaréttarlögmaður og fyrrum formaður Félags fasteignasala ef mér skjöplast ekki.

Hvað kemur þetta ÞÉR við?

Hver er Bilderberger-grúppan?

Nafnið flýgur sífellt fyrir og ég held að þessi hópur samanstandi af klíku háttsettustu manna heims. En af hverju er ég alltaf að heyra þetta nafn núna og aldrei áður? Hvað skrafa menn á þessum fundum? Hver stjórnar? Hver býður? Hverjum er boðið? Tala menn dulkóðað?

Aragrúi tómra íbúða í úthverfum Reykjavíkur

Ekki man ég nákvæmar tölur en á fundi um húsnæðismál á höfuðborgarsvæðinu í gærkvöldi kom fram að mikill fjöldi íbúða er tómur, margar íbúðir eru líka í byggingu og búið að steypa grunn að nokkuð mörgum til viðbótar. Á sama tíma eru einhver brögð að því að fólk sé borið út úr íbúðum sem það ræður ekki við að borga af því að allar reikniforsendur þess brugðust. Páli Gunnlaugssyni, fyrrum formanni Búseta, fannst þetta órökrétt og vitnaði í forsetafrúna.

Og svo kemur fáránleg frétt um litla raunlækkun íbúðaverðs. Á hverju er hún byggð? Örfáum sölum þar sem makaskipti hafa áreiðanlega oft komið við sögu. Og það þarf hvorki snilling né bragðaref til að átta sig á að trúlega eru notuð efri mörk í sölusamningum, m.a. út af lánum, notaðar tölur sem ekkert er að marka. Og fyrir utan það að fullt af fólki heldur að sér höndum í þessu árferði og reynir að þrauka frekar en að sætta sig við ... óásættanlegt verð. Það er næsta lítið að marka markaðinn. Síst af öllu þegar spádeildir fjármálastofnana losa sundur reiknistokkinn.

Verðið átti auðvitað aldrei að hækka svona skart en ég spáði þessu haustið 2004 þegar helvítis bankarnir byrjuðu eyðileggingarstarfið með íbúðalánunum sínum.

Fína íbúðin í Skuggahverfinu sem ég ætlaði að kaupa fyrir slikk af einum stórbankamanninum er seld. Hana keypti einn af hinum nýju eigendum Moggans, Þorsteinn Már Baldvinsson. Hver segir svo að menn raki ekki saman fé á að veðsetja óveiddan fiskinn?

Er þetta nýja, óspillta Ísland?

Minnishegri

Í dag var kynnt fyrir mér orðið minnishegri fyrir litla stykkið sem maður stingur í þar til gerða rauf á tölvu. Á/Í þessum minnishegra geymir maður myndir og texta og flytur auðveldlega með sér. Sumir hafa svona minnishegra á lyklakippunni sinni.

Minnishegri skírskotar til óminnishegra í Hávamálum vegna þess að óminnishegri rænir mann minninu en minnið geymir maður á/í minnishegranum. Sumir nota víst styttinguna hegri.

Ég glöggvaði orðið til að sjá hvort einhverjir hugvitsmenn væru farnir að nota það. Viti menn, einhver reifaði málið á Málefnunum þegar fyrir rúmu ári. Einhver gestur á Baggalút líka í fyrra. Guð blessi netið ...

Myndina fékk ég af keyghost.com

Affarasælla að stela frá fátækum, sagði Halldór Laxness

Fyrir skemmstu heyrði ég mann í útvarpinu lesa nokkrar línur úr Heimsljósi. Því miður hefur mér þótt Ólafur Kárason Ljósvíkingur ofmetinn (sem töffari) þannig að ég las Heimsljós með hangandi haus  og sennilega lokuð augu á sínum tíma og man næsta lítið. Brotið sem maðurinn las í útvarpinu var um það að skynsamlegra væri að stela frá fátækum því að sá sem ætti bara eitt stykki væri jafn fátækur þótt hann yrði af því. Sá ríki sem ætti 100 stykki yrði æfur ef einu stykki væri stolið og væri vís með að eyða mörgum stykkjum til að endurheimta þetta eina.

Sannast hér hvers vegna Halldór fékk Nóbelinn og ég ekki.

Því miður tók ég ekki eftir hverjum var eignuð þessi hugsun í bókinni en mér finnst hún eiga fjandi vel við. Eða kannast menn ekki við að nú sé verið að rífa eignir af þeim sem fáar og litlar eiga? Og bolmagn þeirra til að endurheimta sínar fátæklegu eigur er lítið.

Myndin af skáldinu er fengin af síðu fva.is 

Fjölmiðlungar

Nú er búið að kaupa/selja/gefa Moggann. Hann var/er stórskuldugur. Glitnir Íslandsbanki afskrifar þær skuldir í stórum stíl. Og svo á ég að trúa því að Mogginn sé hlutlaus og upplýsandi fjölmiðill. Af hverju tókst honum ekki að reka sig réttu megin við núllið? Hverjum er í hag að kaupa skuldir?

Og allt í einu lýstur því ofan í höfuðið á mér að Björgólfur sem keypti Landsbankann fékk Landsbankann gegn hlutabréfum í sjálfum sér vildi kaupa DV um árið til að leggja það niður. Hann skóf ekki einu sinni utan af því.

Er ekki orðið tímabært að fá fjölmiðlalög í stað þeirra sem var rifist mest um fyrir næstum fimm árum?

Og er ekki öruggt að verði bankarnir seldir aftur verður eignarhaldið dreift?

Enron = Glitnir?

Ég horfði á bandarísku myndina um bandaríska fyrirtækið Enron sem fór flatt á græðgi stjórnenda sinna - og ég sá Bjarna Ármanns. Ég skil ekkert í þessu ... Heitir hann ekki Stilling sem stóð upp og fór frá fyrirtækinu ári áður en allt hrundi? Og af hverju dettur mér Bjarni í hug ...? Ég er að reyna að koma þessu heim og saman.

B-dagur

Ég verð að halda því til haga að í dag eru liðin 20 ár frá því að menn gátu höndlað með bjór á íslenskum knæpum í stað bjórlíkis. Ég hef svo oft ruglast á árum - og þetta er meðal þess fánýta fróðleiks sem maður dembir stundum yfir saklausa farþega í ferð um Ísland. Ef ég man rétt samanstóð bjórlíkið af vodka og pilsner.

Nú erum við aftur komin með gjaldeyrishöft, skyldi bjórinn svo hverfa á næstunni?

Hver eru þessi 4% sem bera mikið traust til bankakerfisins?

Um 4% landsmanna segjast bera mikið traust til bankakerfisins.

Alveg er ég uppfull af óvissu og er ég þó - og kannski ekkert þó með það - í viðskiptum við sparisjóð. Ráðamenn hafa keppst við að segja í fjölmiðlum að innistæður séu traustar. Þeir hafa ekki alltaf reynst hafa rétt fyrir sér. Ef ríkissjóður þverr fýkur í síðasta skjólið. Sögur berast af fjármálastofnunum sem leysa til sín eignir og ofreikna skuldir sem þær skilja eftir hjá fólkinu sem áður átti eignirnar. Hvað er SP-fjármögnun og hver á það fyrirtæki? Það lánar, er það þá ekki banki þótt það sé ekki einn af viðskiptabönkunum?

Eru það skilanefndirnar sem treysta bankakerfinu? Kvótaeigendur? Opinberir starfsmenn? Unglingar sem eru rétt komnir á kosningaaldur og hafa ekki fylgst með?

Ég skil þessi 96% sem vantreysta bankakerfinu. Því miður.

Huggunin er að nú getur leiðin ekki legið nema upp.

 

Aðalfundur Félags leiðsögumanna

Á Kaffi Reykjavík fimmtudaginn 26. febrúar 2009 kl. 20

Dagskrá:

1. Skýrsla stjórnar fyrir liðið starfsár.
2. Endurskoðaðir reikningar félagsins lagðir fram til afgreiðslu.
3. Tillögur um lagabreytingar teknar til afgreiðslu.
4. Breytingar á reglugerð sjúkrasjóðs teknar til afgreiðslu.
5. Drög að fjárhagsáætlun lögð fram og tillaga um stéttarfélagsgjald.
6. Kosning til stjórnar, varastjórnar og trúnaðarráða, sem og í aðrar nefndir og trúnaðarstöður.
7. Kosning eins félagskjörins skoðunarmanns reikninga og varamanns.
8. Önnur mál.

Leiðsögumenn fjölmenni - auðvitað. Þórhildur? Magga? Virpi? Auður?

Fyrsta frétt

Ég samgleðst manni sem missir vinnuna þegar hann fær nýja vinnu, en myndu ekki sumir kalla þetta eins konar persónugervingu? Er RÚV að reyna að senda þeim langt nef sem vilja skipta um forystu í íslenska seðlabankanum sem mörgum finnst hafa tapað öllu trausti? Þetta var fyrsta frétt, kom á undan ... öllum öðrum fréttum.

Eða er mín áunna tortryggni að troða skynsemi minni um tær?

Ofvaxið skilningi mínum

Hvað eiga bloggsíður Gísla F., Gísla M., Hjartar og Ólafs sameiginlegt?

Hvað eiga síður Friðjóns, Gunnars og Stefáns sameiginlegt?

Og hvernig er bloggsíða Vilhjálms A. Kjartanssonar sér á báti?

Hvað varð um meintan vöruskort Bónuss?

Þegar Guðmundur Marteinsson sagði af miklum þunga í októberbyrjun 2008 að hætta væri á vöruskorti vantreysti ég mati hans. Spaugstofan gerði það líka, ég man að hún grínaðist með að Bónus ætlaði að losna við útrunninn mat á góðu verði (fyrir sig).

Hvar er vöruskorturinn?

Enn er ég pattaraleg.

Kyrrsetning á netinu

Kvöldum saman hef ég nú reynt að glöggva mig á mögulegum flugferðum yfir til meginlandsins með vorinu. Alltaf þegar ég þykist ætla að bóka far með Flugleiðum fæ ég þennan texta:

• Eigum í erfiðleikum með beiðnina eins og hún er framsett. Vinsamlega reyndu aftur eða hafðu samband við okkur ef þetta lagast ekki. (3006)

Erfitt er að vinna úr beiðninni sem stendur. Við mælum með nokkurra mínútna bið áður en reynt er aftur. Við biðjumst afsökunar á þessari töf. byrja aftur

Ég hef sýnt þolinmæði langt umfram þessar umbeðnu mínútur en allt í einu rann upp fyrir mér ljós, við megum ekki fara úr landi!