fráfarandi er ekki samasem fyrrverandi

Ég hef heyrt fólk tala um fráfarandi biskup ÓS. Það er ekki hægt, hann er fyrrverandi. Fráfarandi er sá/sú sem er að hætta.

Lotutúlkun

Ég er á hraðnámskeiði, hálfgerðu skyndinámskeiði, í lotutúlkun þessa vikuna. Ég hef aðeins og bara örlítið fengist við túlkun, yfirleitt þá fengið ræðurnar fyrirfram - og fundist það nógu erfitt. Það sem dr. Dorte er að kenna okkur er hvernig á að túlka ræðu sem er haldin í allt að korter og svo kemur að túlkinum. Þá reynir á (tungumálaþekkinguna, jájá, og) punktatækni.

*svitn*

Ég held að það ætti að kenna hraðritun. Dorte þessi hefur komið sér upp, fyrir sig, alls konar dulmálslyklum fyrir Evrópu og Evrópubúa, lýðræði, í gær og á morgun, fyrir 15 árum, síðustu 15 árin, efnahag, fjármálastjórnun, þróun og sjálfbæra þróun - með orðum úr ýmsum tungumálum og brosköllum, samsettum táknum o.s.frv.

Spennandi. Kannski er framtíð í'ðessu.

Ljótu hálfvitarnir eru uppáhalds

Fullseint að plögga á þessu ári nema þið eigið eftir að fara til Færeyja í lok september en ég mæli þvílíkt hástöfum með tónleikum Ljótu hálfvitanna. Ég hló fyrir allt sumarið í gærkvöldi því að ekki aðeins syngja þeir og spila dáindisvel heldur segist þeim svo vel frá sönnum og lognum atburðum. Sævar er í essinu sínu í nánd við hljóðnema. Og Oddur Bjarni á a.m.k. þúsund svipbrigði. Ég gæti hugsað mér að mæta í messu hjá honum ef hann klárar guðfræðina og fær brauð.

 

30,5 krónur

Það er verðið á hafinni símamínútu ef maður hringir úr Tal-síma í Nova-síma. Mér sýnist verðið fyrir mínútuna annars á bilinu 16-21 kr.

Fimm símafyrirtæki í fámennu landi gera sér far um að koma hér upp frumskógi þannig að maður viti sem minnst.

Steinull og strigi

Eftir fantafína göngu um Öskjuhlíðina í kvöld (í boði OR) met ég heimsókn í undirheima Perlunnar hápunkt kvöldsins. Einar jarðfræðingur sagði mér að víst væri geymt 80°C heitt vatn í fjórum geymum af sex. Og við nokkur sérlega áhugasöm fengum að ganga undir Perlunni og skoða leiðslurnar - og einangrunina. Utan um leiðslurnar er steinull, utan um steinullina er strigi og hann er málaður hvítur. Kjarval hvað? Svo eru gormar til að mæta breytum í leiðslunum.

Gaman!

Og ekki spillti síðsumarsveðrið, seiseinei.

Frímúrarar, Seðló og strætó

Úrvalsmenningarhátíð í gær. Ég heilsaði upp á frímúrara, gekk um salarkynnin, fékk kleinu og las bæklinginn. Þeir segjast ekki fela neitt.

Ég skemmti mér við að fylgjast með vígslu nýs skiltis á Klambratúni og fór svo í Seðlabankann og reyndi að leysa aðsteðjandi vanda með stýrivöxtum.

Get ekki kvartað.

Verð hins vegar að kvarta undan strætó. Ég ætlaði til Hveragerðis í dag, skoðaði straeto.is og sá að ég gæti ekki tekið vagn upp í Mjódd þaðan sem leið 51 fer. Vagnarnir byrja nefnilega að ganga kl. 12 almennt og yfirleitt á sunnudögum í höfuðborg Íslands. Ég kom mér í Mjóddina með harmkvælum rétt fyrir 12 til að ná vagninum sem færi kl. 12 - en viti menn, á leiðaspjaldinu þar stendur að vagninn fari kl. 12:30. Strætókortasjoppusalinn kom af sömu fjöllum og ég og aðrir farþegar. Þetta er meintur vetrartími sem hófst víst í dag.

Ætli dr. Gunni hefði staðið vaktina betur sem stjórnarformaður?

Reykjavíkur-10-km-LARGE

Ég sótti rásnúmer og önnur gögn í Laugardalinn áðan af því að ég ætla að hlaupa mína árvissu 10 kílómetra á morgun. Ég bið alltaf um stærð L í bol og nú sé ég mér til verulegrar furðu að hún hefur rýrnað um 25% frá árinu 2007. Táknrænt, geri ég ráð fyrir. Nýja L smellpassar utan um mig og þess vegna ætla ég að flagga gróðærinu á morgun.

68 kóra söngur

Gva, hvað það var gaman að vera leiðsögumaður í gær. Sólin skein, leiðsögumaðurinn lék við hvurn sinn fingur, farþegarnir hlógu að öllum bröndurunum og launuðu með kórsöng, súkkulaði og faðmlögum. Finnski kórinn frá Vallis og ég vinguðumst hratt og örugglega.

Á morgun syngur hann með 67 öðrum kórum frá Norðurlöndunum og Eystrasalti úti um alla borg á menningarhátíð. Ég mun leita þau uppi og hvet aðra Reykvíkinga til að gera slíkt hið sama.

 

Nú kárnar gamanið - ég mótmæli

Vísir (hefur kannski hagsmuna að gæta?) segir mér að nú eigi að veita uppáhaldsþættinum mínum í útvarpi náðarhöggið. Ef einhver töggur væri í mér tæki ég nú á mig rögg, rigsaði upp í Efstaleiti og ætti gott samtal við símadömuna. Ég efast um að Páll sé ínáanlegur fyrir venjulega aðdáendur eðalþátta á Rás 1.

Skrambans.

Eins gott að Páll frétti ekki af því að ég hlusta líka alltaf á Vikulokin á laugardagsmorgnum.

Geysir, Dettifoss, Reynisfjara, vörður o.fl.

Það er gaman að segja frá því að Kári Kristjánsson stendur vaktina með sóma í Laka, a.m.k. nú í sumar. Ég hef að vísu bara komið þangað tvisvar en í bæði skiptin spratt hann út úr bílnum, tók sér stöðu við upplýsingaskiltið og leiðbeindi komumönnum. Bæði útskýrði hann leiðina sem best væri að fara og brýndi fyrir mönnum að gróðurinn væri viðkvæmur og að við þyrftum að halda okkur við stígana. Hann býr í Blágili og er alveg vakinn og sofinn.

Þetta vekst upp fyrir mér þegar ég hlusta á Ólöfu Ýrr ferðamálastjóra og Baldvin Jónsson leiðsögumann (ekki í leiðsögumannatalinu) tala í Kastljósinu um gjöld, aðbúnað og öryggismál á fjölsóttum ferðamannastöðum. Ég er alveg á því að aðbúnaður þurfi að batna og ég get ekki skilið að peninga skorti. Peningur kemur inn á þessum stöðum og það ætti að vera hægt að nota hann í stígagerð - og landvörð sem t.d. varar fólk við gáleysislegri hegðun. Og mætti ég biðja um að fólk hætti að henda klinki í Blesa, það væri nær að skilja eftir gild greiðslukort eins og dæmi eru um í Flosagjá ...

Farsímafár

Eins og gefur að skilja hefur margur farsíminn ratað inn á heimilið. Allir gefa þeir upp öndina fyrr eða síðar en hver með sínu móti. Nú sýnist mér kreppusíminn sem ég keypti 4. október 2008 af verulega illri nauðsyn vera að syngja sitt síðasta og það í hljóði. Hann slekkur á sér, klárar hleðsluna á fimm klukkutímum í bið, frýs - og tekur myndir að eigin frumkvæði. Í alvöru, hann bara liggur á borðinu og katsjinnng, allt í einu opnast myndavélargatið og hann smellir mynd af borðinu.

Mér finnst þetta skárri aðferð til að ljúka farsímalífi sínu en að hætta skyndilega þegar ég er að hlusta á spennandi þátt í útvarpinu (í símanum).

Og nú þarf ég enn að leita mér að síma sem uppfyllir lágmarkskröfur mínar. Kannski sunnudagurinn fari í það.

Hvað hangir á Mílunni?

Ég fylgdist með gosinu í Eyjafjallajökli mest í gegnum Mílu-vefinn og fannst nokkuð hraustlega gert (af fyrirtækinu). Nú er Míla búin að bæta við vefmyndavélum í miðborginni, við Geysi og í Bláa lóninu. Maður þarf ekki að fara út úr húsi lengur til að sjá fólk og fugla busla ...

Í lok ferðar

Nú er ég búin að vera hálfsambandslaus á gangi á Suðurlandi með átta Þjóðverja sem sögðu salíróleg: Meðan þið sem búið á Íslandi eruð róleg yfir eldfjöllunum erum við það líka.

En hvað veit maður? Hekla hótar að gjósa með korterisfyrirvara, Eyjafjallajökull reykti meðan við fórum inn í Þórsmörk og forsetinn ,,hótar" útlendingum með Kötlu sem er löngu komin á tíma. Við keyrum framhjá augljósum ummerkjum um vatnsflóð og á gangi meðfram Skógaá fer ekki á milli mála að þar féll aska fyrir skemmstu. Jöklar aka sér til, hopa og gliðna meðan við stingum niður fæti.

Er öryggið áreiðanlega áreiðanlegt?

Hengillinn er skæslegur

Að vísu herma heimildir að Hengillinn sé megineldstöð og þótt hann hafi ekki látið á sér kræla í 2000 ár fer því fjarri að hann sé sofnaður svefninum langa. Rölt um hann er því ekki endilega hættulaust, frekar en ráp upp á Heklu. En hey, það er líka hættulegt að ganga yfir götuna þannig að ég mæli eindregið með hæfilegri gönguleið í Henglinum. Þær spanna samtals eina 125 kílómetra þannig að allir ættu að geta fundið sína eigin ...

Hvalfjarðargöng

Er verið að spara rafmagn með því að hafa lýsinguna svona naumt skammtaða í göngunum? Ég sá nefnilega í fréttatímanum að það munar miklu. - Kannski er þetta ástæðan fyrir að ég keyrði einu sinni í gegnum göngin á 40 kílómetra hraða ... á mótorhjóli. Þvílíkt sem ég var stressuð.

Væru ríkisrekin göng öruggari? Maður spyr sig.

Traffík í Reykjadalnum

Ég æfði stafagöngu í uppsveitum Hveragerðis í dag. Þar var stríður straumur útlendinga á leið í heitu ána. Fólk stoppaði mig og spurði hvað það ætti langt eftir í heitu laugina. Og ég fór að hugsa um hvers vegna ferðaþjónustan utan um skemmtiferðaskipin býður ekki gönguferðir með hinum ferðunum. Það er langtum yngra og frískara fólk farið að sigla á þessum skipum, fólk sem er til í smááreynslu.

Þarna er himnesk litasamsetning, hverir, hveralykt, smápríl, 2ja tíma róleg ganga. Svo má prjóna Þingvöllum við ef um er að ræða heilan dag.

Þegar ég var í skipunum fórum við stundum salíbunu upp á Langjökul, ekki á sleða eða neitt heldur bara keyrðum upp á jökul með fólkið aftan á vagninum. Kannski voru þær lagðar af en ferðaþjónustan þarf stöðugt að brydda upp á nýjungum. Eitt árið var rúntur í Rauðhólum sem náði ekki flugi.

Ganga í Henglinum gæti hins vegar gert sig.

 

Allir í sundi

Það var ekki hægt að kvarta undan mannfæð í sundlaugunum mínum um helgina. Í dag varð ég t.d. að láta mér nægja að svamla í heitasta pottinum og kryfja heimsmálin þar sem allar brautir voru uppteknar þann tíma sem ég hafði tekið frá til sundiðkunar.

Er þessi íþrótt ekki að verða æ vinsælli?

Næstu vikuna eða svo ætla ég að ,,æfa" göngur - enda styttist tíminn í annan endann áður en mitt árlega 10 km hlaup hefst. 21. ágúst er hin heilaga dagsetning þessa árs. Fjölmennum í skokk Reykjavíkurmaraþonsins!

Íbúðin mín óskast

Það er með ólíkindum að ég skuli ekki finna 100 fermetra íbúð með góðum sólarsvölum í 101, 105 eða 107 á sanngjörnu verði. Hverjir lúra á íbúðinni minni? Réttur seljandi vinsamlegast gefi sig fram.