menningarnott.is

Gargandi fín gagnvirk síða sem hjálpaði mér að velja mína viðburði. Vantar bara maraþonskokkið.

Spekileki eignarfallsins

Langreyndir og elskuverðir fréttamenn eru farnir að nota þágufall í stað eignarfalls á eftir forsetningunni vegna. Þykir mér það miður.

Öllum þykir áreiðanlega óeðlilegt að segja *vegna Agli eða *vegna Grími (og t.d. líka Aglison eða Grímison). Eins er rétt að segja: vegna breytingar.

Að biðjast eða biðjast ekki afsökunar

Alveg er mér slétt sama hvort Hreiðar eða annar peningabúbbi biður mig afsökunar eða ekki. Ég vil bara að hann skili ofteknu fé. Og ekki til mín, heldur þeirra sem hann hirti það af. Og það sama á við um alla hina.

Hvað varð um 500 milljarða lánið sem Kaupþing fékk í október 2008? Af hverju sagði HMS að ekkert af því láni félli á okkur? Hvað á hann sjálfur mikið eftir af ofurlaunum, kaupréttum, bónusum og kúlum? Hvernig væri að hann skilaði því til þeirra sem öfluðu þess fjár?

Ég hætti í viðskiptum við Búnaðarbankann skömmu eftir að HMS og SE byrjuðu með kaupaukana sína. Þótt þeir væru reknir með þá til baka í eitt skipti var það bara skammgóður vermir. Árið eftir nennti enginn lengur að ybba gogg, bara nokkrir nytsamir sakleysingjar hættu í viðskiptum við bankann. Ég var ekki átthagabundin með íbúðarlán og gat gefið þeim langa nefið sem ég hef séð í öðrum bloggfærslum í kvöld.

En ég þori að hengja mig í hæsta gálga upp á það að allmargar fullorðnar konur hafa hrifist af einbeitninni sem skein úr augunum. Hann er svo laglegur.

Sigmar var ágætur. Hvernig talar maður við sjálfumglaðan vegg sem varpar öllum spurningum til baka með yfirlýsingum um eigið ágæti?

Peningar eru ekki verðmæti

Peningar eru ávísun á verðmæti, s.s. góðan mat, falleg föt, ljót föt, hraðskreiða bíla, glæstar þyrlur, einkaþjálfara, megrunartöflur, gleðitöflur, ótakmarkaðar lendur - og t.d. fiskveiðikvóta.

Hvenær mun það ljós renna upp fyrir fjármálagúbbunum og meintum kvótaeigendum að illa fengið handbært fé ávinnur þeim ekki sálarró, eilíft líf og óskoraða aðdáun hinnar vinnandi handar? Menn þurfa að vera a.m.k. dálítið siðlausir til að líða vel með það að hagnast stórkostlega á vinnu og/eða óförum annarra og ég held að menn þurfi að vera öllu siðlausari til að snúa alls ekki af villu síns vegar.

Meðan peningum er ekki til að dreifa eru þeir nauðsyn, eftir það eru þeir ofmetnir. Til hvers þarf nokkur maður mörg hundruð sinnum meira en hann þarf?

Tekst ekki að manna frístundaheimili

Frétt í útvarpinu hljóðaði upp á að enn vantaði um 100 manns í störf á frístundaheimilum borgarinnar. Ú! Svo þarf spjallþátt í útvarpinu eða blogg til að benda á hvers vegna fólk á atvinnuleysisskrá sækir ekki um - það er verr borgað að mæta í þá vinnu en að vera á atvinnuleysisbótum og atvinnulausir missa að auki hlunnindi, s.s. sundkort og leikhúsmiða.

Svo er dálítið gremjulegt að fólki skuli finnast að það að annast um börn í frítímum þeirra sé svo lítilsiglt starf að hægt sé að dubba hvaða sótraft sem er upp í það. Það er mjög krefjandi starf, alveg áreiðanlega ekki metið að verðleikum og hreint ekki heppilegt fyrir einhverja fjármálagúbba sem eru ekki einu sinni næmir á líðan fólks á pappír [Jón Sigurðsson á seðlinum], hvað þá í raunheimum.

Og eitthvað segir mér að þetta sé ekki nýtt.

Sex dagar til stefnu

Á laugardaginn er maraþonskokkið og ég er búin að finna strigaskóna mína. Veit samt ekki enn í hverju ég ætla að skokka mína hefðbundnu 10 kílómetra. Fer kannski í búð á föstudaginn.

RÚV - *geisp*

Er ekki lágmark vikurnar eftir að RÚV-nefskatturinn er tekinn upp að vera með myndir um helgar sem ekki eru bæði B-myndir og 25 ára gamlar?

*geisp*

Svo minni ég á að Þráinn er í aukaföllunum: um Þráin, frá Þráni, til Þráins.

Smartphone

Í dag var ég beðin að venda tveimur línum um síma úr ensku yfir á íslensku. Maður gæti haldið að það væri lítið mál, og stundum er það lítið mál. Í þessari litlu orðahrúgu var orðið smartphone sem ég ímynda mér að vísi til einhvers ákveðins við símann, útlits hans eða notkunarmöguleika. Mér datt snjallyrðið snjallsími í hug og leitaði á síðum Vodafones og Símans en fann ekki. Gafst ekki upp og fann TÖLVUORÐABÓK. Vei. Það dugði.

smartphone = snjallsími

Bókaránið mikla

Á síðustu öld lét háttsettur starfsmaður á Konunglega bókasafninu í Kaupmannahöfn greipar sópa um verðmætin í hillunum. Og nú er ég að lesa bók um glæpinn. Glæpamaðurinn var ótrúlega bíræfinn og komst - lengi - upp með allt vegna brotalamar í öryggis-, skráningar- og umgengnismálum.

Þau voru í ólestri. Hahha.

Síðar kom Svarti demanturinn til sögunnar.

Það er ekki frítt við að ég skilji bókina sem ádeilu á hroðvirkni opinberra starfsmanna.

Geitungur gerir stutt stopp

Þegar ég fór á fætur í morgun sá ég strax að geitungur hafði fundið rifu á glugga og smeygt sér inn. Ég opnaði gluggann betur, og alla glugga íbúðarinnar reyndar, og fór svo að sinna öðru. Næst þegar ég mundi eftir honum var hann horfinn á braut.

Er það ekki svona sem maður tekur á aðkomu...fyrirbærum, kvikindum, annarra manna skuldum og öðru sem heillar mann ekki? Býr til undankomuleið?

Bókabúð & bókabúð, bókabúð eða bókabúð

Mér varð áðan gengið framhjá nýrri bókabúð í fyrrverandi húsnæði SPRON. Röðin sást langt niður Skólavörðustíginn og ég fagnaði hinum nýtilkomna raunáhuga bókaþjóðarinnar. Þegar nær dró sá ég þó hvað hékk á spýtunni.

Grillið var í gangi.

Enginn álagningarseðill

Fyrst leitar maður að sök hjá sjálfum sér. Ég hef ekki fengið álagningarseðil sendan heim og því spyr ég mig: Hakaði ég (les: endurskoðandi minn) við einhverja beiðni við framtalið um að ég (les: ég) vildi ekki seðil með upplýsingum? Ef til vill.

En, fnæs, þótt ég sé umhverfisverndarsinni svo að jaðrar við væmni vil ég ekki að skattaskuldir mínar hverfi í óminni netsins. Og hvert ætti ég sossum að hringja?

Nei, ég fór bara til skattmanns og bað um að fá að gera upp. Ég þarf þá ekki að treysta bönkunum fyrir umframfénu á meðan. Vona bara að ríkiskassinn fari vel með peninginn sem ég aflaði á síðasta ári.

Meðan ég beið eftir afgreiðslu fletti ég álagningarskrám, A-E. Það er hægt að gleyma sér yfir náunganum ...

Brjálað að gera hjá bílaleigunum?

Detti mér allar dauðar lýs úr höfði. Í fréttum Stöðvar 2 var stór frétt um að ef menn ætluðu að ná sér í bílaleigubíl fyrir næstu helgi - sem er áreiðanlega stór ferðahelgi með fiskideginum mikla og fleiru - yrðu menn að hafa hraðar hendur.

Hmm, síðast og þarsíðast þegar ég heyrði talað um bílaleigurnar svitnaði fólk yfir háu verði. Og ég er svo tortryggin að ég held helst að þetta hafi verið feit ókeypis auglýsing fyrir bílaleigurnar.

Svo náði ég alls ekki að hverjum gagnrýnin beindist. Bílaleiguviðmælandinn talaði um að 3 milljarðar hefðu tapast í gjaldeyristekjum af því að bíla vantaði. Hmm, hver átti að leggja þá til? Hlunnfór einhver hann um 500 bíla?

Ég er enn ekki vaxin upp úr því að finnast 3 milljarðar talsvert margir peningar - líka í krónum. Og ég trúi ekki á þessa frétt. Á Jón Jóhannesson kannski bílaleigu?

Ys og þys í bankanum

Ég hafði ekki tækifæri til að setja endapunkt á viðskipti mín við Skaupþing í dag. Röðin var of löng. Skyldu það vera mánaðamótin, allir að borga reikninga í holdinu ...?

Áhlaup hafið

Lengi hefur mér boðið við framkomu fyrrum yfirmanna Kaupþings, og Sigurður og Hreiðar ýttu mér persónulega yfir til sparisjóðs. Um daginn var ég svo flutt hreppaflutningum yfir í Kaupþing aftur og nytsami sakleysinginn ég ákvað að gefa núverandi yfirmönnum tækifæri til að sanna sig.

Ó svei.

S24 hefur ekki klikkað hingað til og nú set ég allt mitt traust á þann netbanka, endurnýja greiðslukortið og legg platínukortinu sem Kaupþing prangaði inn á mig. Ítreka þó það sem ég hef áður sagt að afgreiðslufólkið hefur verið lipurt.

Dybt at falde

Hvað gæti verið betra um verslunarmannahelgi en að sitja á svölunum og lesa danska sakamálasögu?

Það væri sossum hægt að fá sér kríu í Vestmannaeyjum - er ekki orðið svo lítið um lunda ...?

Hverjir eru tengdir aðilar?

Ég spurði hr. Google og hann gaf nokkur svör, m.a.:

Tengdir aðilar: Lögaðilar þar sem svo háttar til að sami aðili eða sömu aðilar eiga meiri hluta hlutafjár, stofnfjár eða atkvæðisréttar í báðum eða öllum lögaðilunum, enda nemi eignarhlutur hvers þeirra um sig a.m.k. 10% af hlutafé, stofnfé eða atkvæðafjölda í viðkomandi lögaðilum. Sama á við ef einstaklingar eða lögaðilar, sem eiga meiri hluta hlutafjár, stofnfjár eða atkvæðisréttar í lögaðila og hver um sig á a.m.k. 10% hlutafjár, stofnfjár eða atkvæðisréttar í lögaðilanum, eiga ásamt viðkomandi lögaðila meiri hluta hlutafjár, stofnfjár eða atkvæðisréttar í öðrum lögaðila. Til eignarhluta og atkvæðisréttar einstaklinga í lögaðilum samkvæmt þessum tölulið telst jafnframt eignarhlutur og atkvæðisréttur maka og skyldmenna í beinan legg. 
 

Þarf að fara á milli mála hverjir eru tengdir aðilar? Getur sonur verið 20% tengdur af því að hann á 20% eignarhlut í fyrirtæki pabbans? Eða eru blóðtengsl sjálfkrafa 100%?

Mikið er ég orðin langeygð eftir að menn breyti rétt af því að það er rétt, óháð því hvað klásúlur segja, lagaromsur eða doktorar í hagvísindum.

Innherjaupplýsingar prófarkalesara

Fyrir nokkrum árum prófarkalas ég ársskýrslu símafyrirtækis. Nokkrum vikum síðar var ég beðin um að prófarkalesa ársskýrslu annars símafyrirtækis en þegar almannatenglinum varð ljóst að ég hefði lesið skýrslu hins fyrirtækisins var ég orðin að innherja og mátti ekki lesa síðari skýrsluna. Tek ég þó fram að báðar skýrslurnar voru á endanum til birtingar.

Einu sinni las ég líka ársreikning Búnaðarbankans. Þá var ég kyrrsett á auglýsingastofunni alla nóttina því að ekkert mátti mögulega leka út áður en hann yrði birtur.

Ég gæti ekki unnið mér til lífs að muna eitt einasta viðkvæmt atriði úr þessum lestri öllum.

Hvernig stendur á því að séð er til þess að smæstu peðin í taflinu steinhaldi kjafti en kóngarnir sjálfir leka öllum hagnýtu upplýsingum til sjálfra sín? Ef eitthvað er að marka fréttir vikunnar gerðu bankastjórar Glitnis áhlaup á bankann sinn á undan öðrum og létu sér þá í léttu rúmi liggja hversu sárir aðrir gengju frá (tafl)borði.

Er bensínverðsamkeppni horfin yfir móðuna miklu?

Eru Atlantsolía, ÓB og Orkan hætt að veita N1, Olís og Skeljungi heilbrigða samkeppni? Og umræðan dáin drottni sínum líka?

Mig vantar helling af bensíni í dag og fletti því upp á heimsíðum félaganna til að glöggva mig á verðinu. Vissulega munar allt að fjórum krónum á lítranum. En setjum sem svo að tankurinn taki 50 lítra, þá er munurinn á 183 (50x183=9.150) og 187 (50x187=9.350) 200 krónur. Og ég myndi ekki taka á mig krók fyrir 200 krónur, enda mega menn ekki gleyma að krókurinn kostar líka. Svo vilja félögin átthagabinda menn með sérmerktum kortum og lyklum sem veita einhverra króna afslátt. Ég kann þeirri tilhugsun illa.

Ég gruna olíufélögin um að vera í innbyrðis krosseign.

Kannski væri hægt að rukka í Dimmuborgum

Egill Helgason mælir því bót að rukka inn á vinsæla ferðamannastaði og Landgræðslan íhugar að byrja að rukka aðgangseyri að Dimmuborgum í Mývatnssveit til að bregðast við mikilli aðsókn ferðamanna. Ég er ekki á móti því að menn borgi fyrir afnotin en mér finnst óeðlilegt að rukka fyrir aðgang að hverjum stað - og aðallega held ég að það sé tæknilega illframkvæmanlegt. Það er dýrt í sjálfu sér. Það er klassískt umhugsunarefni hvernig eigi að rukka inn á Geysi, Dettifoss og Ásbyrgi. Hvað með Hvítserk? Hann verður kannski ekki fyrir ágangi en fólk keyrir veginn til að komast nær honum og við það slitnar hann.

Í öllu fallli yrði leikurinn ójafn en látum það liggja á milli hluta.

Gætum við læst Geysi kl. 9 á kvöldin? Er meiningin að vera með vakt? Hvað með öryggi?

En kannski er bara með þetta mál eins og Evrópusambandið, erfitt að fá heilbrigða umræðu um kosti og galla og á endanum kalt mat.

Ég var í Dimmuborgum í gær og allir mínir farþegar gengu litla hringinn. Einn skokkaði hann á fjórum mínútum og þeir seinfærustu voru 20 mínútur. 100 kall? Og miða, gjörðu svo vel? Veitingastaðurinn til hliðar tók sig vel út og ég fagna tilkomu hans, en ætti að setja upp sölubás við hliðið? Tæknilega framkvæmanlegt í Dimmuborgum.

Ég finn samt að mér líður illa með tilhugsunina um að rukka inn á einstaka staði.

Bróðir minn rekur vegasjoppu og þar stoppaði fólk um daginn með bíl á síðasta snúningi, þrjú systkini hafi ég tekið rétt eftir. Að beiðni þeirra reyndi hann að finna fyrir þau bílaleigubíl. Þar sem það gekk ekki lánaði hann þeim sinn bíl í 2-3 daga (stóð vel á hjá Gumma) og fékk bifvélavirkja frá Hvammstanga til að gera við bilaða bílinn. Systikinin komu að 2-3 dögum liðnum með bílinn fullan af bensíni og færðu honum bæði pening og gjafir.

Ég sakna þess að fólk geri hlutina rétt bara af því að það er rétt, eins og þau gerðu öll í þessu tilviki. Þau smullu kannski bara saman upp á gamla móðinn.