Reynsla mín af lögreglunni

Hún er sem betur fer næsta lítil. Fyrir sjö árum átti ég svarinn óvin sem hringdi sí og æ til að ergja mig. Það er náttúrlega ekki lögreglumál, en eina nóttina hringdi hann úr óskráðu símanúmeri og hótaði mér ýmsu illu í talhólfinu. Ég geymdi upptökuna eins lengi og ég gat og spilaði hana fyrir lögregluna. Um svipað leyti voru skorin dekkin á bílnum mínum.

Enn er ég á lífi og við góða heilsu þannig að kannski hefur mat lögreglunnar verið rétt þegar hún svo gott sem sagði: Við höfum ekki áhuga. Orðalagið var samt meira eins og: Við höfum ekki mannskap og ekki tækjabúnað til að rekja svona. Láttu hengja númerið upp hjá símanum og þá er *hóst* hægt að rekja það ef viðkomandi hringir aftur.

Skömmu síðar hætti ég í vinnunni sem ég hafði þá gegnt í rúmt ár og ofsóknunum létti. Ég er auðvitað 100% sannfærð um hver maðurinn var en ég gat ekki þá og enn síður núna sannað hið sanna. Og þótt ég hafi ekki beðið óbætanlegt tjón var margur nætursvefninn tekinn af mér og um stundarsakir kom það niður á skapsmunum mínum.

Það er í mér ein taug sem vorkennir lögreglustéttinni sem er áreiðanlega undirmönnuð og sér fram á verri tíð með arfa í haga. Ég held samt að oft bíði borgarar óþarft tjón vegna þess að lögreglan ákveður að eitthvert mál sé óvinnandi. Um það sannfærðist ég þegar ég stóð á skrafi við Hermann á Laugaveginum í dag. Ég vona að hann segi sína sögu hvað úr hverju.

Fasteignaleitin stendur yfir

Leit mín er mjög þröng, helst bara á 101-svæðinu. Kröfurnar nákvæmar, hæð með suðvestursvölum. Nú rakst ég á íbúð sem er verðlögð á 27.900.000 og áhvílandi eru 27.926.736. Fermetraverð þó ekki nema tæplega 290.000 ...

Alveg eins og ég vil eðlilega gera góð kaup vil ég ekki nýta mér það að fólk þurfi að selja til að losa sig út úr skuldum. Fasteignir eru ekki leikföng eins og stundum má túlka sumt annað.

Eins og öðrum þegnum blöskrar mér í hvaða hremmingar fólk er komið. Ég skil ekki þegar ég heyri fólk í fjölmiðlum tala um að engin umræða sé um þetta, mér finnst allir vera að tala um óráðsíu og gönuhlaup, ekki síst bankanna. Er fólk ekki að meina að ráðamenn þegi þegar það segir að enginn sé að tala um vandann?