Frjáls og óháður í vinnunni

Ekki er ég þess umkomin að draga frásagnir Jónasar í efa, að hann hafi farið í félagsfræðinám til Þýskalands og m.a. lært að gera skoðanakannanir, orðið ritstjóri ungur, tekið þátt í að stofna Blaðaprent og svolítið leiðst hingað og þangað. Ég held reyndar að það megi kallast húmor þegar hann segist hafa orðið hálaunamaður án þess að ætla sér það.

Á stílnum get ég hins vegar haft skoðun og ég leyfi mér að vera ósammála Jónasi um framsetningu. Um miðja bók er ég orðin svo lúin á stakkatóinu, hver efnisgrein er áreiðanlega aldrei meira en 100 orð og stundum byrjar efnisgrein næstum á sama hugtaki eða sömu lýsingu og sú síðasta endar á. Það er eins og að hver klausa eigi líka að geta verið sjálfstæð og óháð og fyrir vikið finnst mér vanta flæði í frásögnina. Hann forðast líka frumlagið og byrjar margar setningar á sögnum eins og hann sé á ógurlegri hraðferð.

Annars er það helst að frétta að ég er búin að gera tvær tilraunir til að baka ólífubrauð (sem fæst ekki lengur í bakaríum). Fyrst notaði ég uppskrift frá Nönnu Rögnvaldardóttur og ætlaði aldrei að fá deigið til að tolla saman, endaði á því að bæta við meiri og meiri olíu og setti m.a.s. egg sem er ekki í uppskriftinni. Brauðið kláraðist leikandi þegar það var loks fullbakað.

Svo prófaði ég einfaldari uppskrift frá Tiger Foods og það var eins og við manninn mælt, það hefaðist og hegðaði sér eins og hugur minn. Það er enn að einhverju leyti óetið.

 

Athugasemdir

[Hrafnhildur (IP-tala skráð) 3.2.2010 kl. 15:27]

Skrítin Tiger Foods uppskriftin - lýsingin miðast við ger en í uppskriftinni er lyftiduft. Hvort notaðir þú ?

[Margrét E (IP-tala skráð) 3.2.2010 kl. 17:13]

myndó myndó, (án frumlags) hjehje

[Berglind Steinsdóttir, 3.2.2010 kl. 18:04]

Fyrra brauðið bragðaðist betur (hugsanlega notaði ég of mikinn hvítlauk í seinni atrennu, téhé). Já, ég notaði hvort tveggja, helv. gerið sem ég var búin að hafa fyrir að kaupa OG lyftiduftið. Það væri gott að mega sleppa gerinu framvegis. Næst er ég reyndar að hugsa um að baka brauð með graskersfræjum.

[Ásgerður (IP-tala skráð) 3.2.2010 kl. 22:31]

...og svo þarftu að koma til mín og læra upppskrift að brauði sem er svo auðvelt í meðförum að þú þarft ekki að bíða eftir því að það hefist og jafnvel ekki koma við deigið - nema þig langi til þess. Afar fljótlegt og einfalt.

[Berglind Steinsdóttir, 3.2.2010 kl. 22:45]

Ó? Á sunnudaginn kl. 13?

[Ásgerður (IP-tala skráð) 3.2.2010 kl. 23:18]

Jebb! Heima hjá mér í staðinn fyrir hádegismatinn sem ég sveik ykkur um í dag.

[Berglind Steinsdóttir, 3.2.2010 kl. 23:37]

Framhaldsumræður flytjast yfir í önnur form ...