Á höggstokkinn

Ég kann að leggja saman, draga frá, margfalda og deila. Ég lærði hvorki diffrun né heildun og hingað til hef ég plumað mig án þess. En nú [hægra handarbak að vinstra gagnauga] veit ég ei meir, ei meir.

Ég - nú legg ég mig á höggstokkinn - hélt að þegar kyrrsettu eignirnar myndu innheimtast rynnu þær í ríkissjóð. En nú heyri ég á mér gáfaðra fólki að þær renni til kröfuhafa bankanna - og kenningu um að kröfuhafar bankanna séu skuldararnir, þ.e. þeir sem peningarnir verða teknir af.

Sum sé, sr. Jón tekur 2.400 milljarða að láni og geymir undir kodda á Falklandseyjum. Svo er honum stefnt fyrir dómstóli í einhverri Jórvík, játar sig sigraðan enda kostar milljón dollara að snerta hurðarhúninn, skrifar lista yfir eignirnar, lætur þær af hendi - og tekur svo við þeim sjálfur, óbreyttur Jón.

Ég engist á grefilsins höggstokknum. Ég sver að ég hélt að það þyrfti ekki að skera stærri möskva á öryggisnet velferðarkerfisins ef peningurinn innheimtist.

Athugasemdir

[Hrafnhildur (IP-tala skráð) 19.5.2010 kl. 11:01]

Ég er svo lítið fyrir samsæriskenningar, og held að þetta sé aðeins of mikil einföldun. Það getur ekki verið að þeir kröfuhafar bankans sem er með forgangskröfur séu einungis þeir kyrrsettu.

[Berglind Steinsdóttir, 19.5.2010 kl. 21:26]

Nei, ekki ég heldur, segir hin áhrifagjarna. Treysti mér ekki í heita pottinn í kvöld svo ég yrði ekki fyrir frekari áhrifum.