Stór stafur í línu tvö - hugleiðing

Hvað veldur því að sumir hafa fyrsta stafinn í annarri línu stóran þótt fyrsta lína endi á kommu? Þið skiljið hvað ég meina, maður er ávarpaður í línu eitt með t.d.: Sæll, og svo byrjar bréfið í næstu línu á: Ég hef verið að hugleiða ...

Ég sé þetta í ensku og geri ráð fyrir að menn taki það upp þaðan en jafnvel þótt það væri rökrétt í ensku - sem ég sé svo sem ekki - er alls ekki sjálfgefið að það sé rétt eða eðlilegt í íslensku sem er frekar mikill vinur litla stafsins.

Mér finnst þetta tilgerðarlegt. Ég vil ekki segja að það fari í taugarnar á mér (því að það er svo smáborgaralegt, hmmm). Ég tek fram að ég hef bara séð þetta í íslensku hjá Íslendingum. 

Es. Feitletraði það sem málið snýst um, m.a. kommuna (,) fyrir aftan sæll.

Athugasemdir

[Kristín M. Jóhannsdóttir, 10.2.2007 kl. 22:16]

Ah, en Anna, þú setur kommu á eftir Sæll. Berglindi er ekkert að amast við því (held ég) heldur því þegar fólk segir:

Sæll,
Það er.... 

Mér finnst nú yfirleitt best að setja bara upphrópunarmerki á eftir svona ávarpsorðum. En Berglind, kannski táknar þetta sem þú ert að tala um hreinlega það að fólk kunni ekki kommusetningareglurnar lengur.

[Hrafnhildur (IP-tala skráð) 11.2.2007 kl. 10:12]

 

Setja einhverjir kommu á eftir Sæl, ég fæ alla vega fáa tölvupósta með slíkri kommusetningu. Ég á hins vegar mjög mjög mjög marga sem setja ekkert á eftir "Sæl" en sé núna að þar vantar punkt. Tek þetta til mín og "lofa" að setja punkt eða upphrópunarmerki á eftir Sæl/Sæll hér eftir, nema þegar ég gleymi því.

Hrafnhildur

[Kristín M. Jóhannsdóttir, 11.2.2007 kl. 17:08]

úps, ég meinti að Anna setti punkt á eftir Sæll en ekki kommu. Það var það sem ég ætlaði að benda á.

[Berglind Steinsdóttir, 12.2.2007 kl. 08:35]

Bingó, Stína! En ... ekkert svar, síminn hringir og hringir ...

[hrafnhildur (IP-tala skráð) 13.2.2007 kl. 08:50]

 

"Stór stafur í línu tvö-hugleiðing

Hvað veldur því" að það er alltaf stór stafur í línu tvö á eftir fyrirsögn sem þó hefur hvorki punkt, upphrópunarmerki né spurningarmerki? 

[Berglind Steinsdóttir, 13.2.2007 kl. 09:49]

Ert þú ekki að spyrja mig þess sama og ég spurði í upphafi máls?

[Berglind Steinsdóttir, 13.2.2007 kl. 11:47]

Nei, nú var ég sein að hugsa. Það er vegna þess, Hrafnhildur, að lína eitt útleggst sem fyrirsögn (þótt hún sé þá ávarp) og meginmálið hefst í línu tvö.

[Hrafnhildur (IP-tala skráð) 13.2.2007 kl. 14:36]

Allir mínir póstar byrja á fyrirsögn hér eftir. Það er mín pólitíska ákvörðun.