DV á hálum málfræðiís

Það er sjálfsagt tilviljun en mér finnst villum hafa fjölgað í blöðunum. Mönnum *lýst á eitthvað og *þeim langar í eitthvað annað. Allar málbreytingar byrja sem málvillur þannig að kannski er óþarfi að verða eitthvað hörundsár. Margar slettur hafa líka náð fótfestu, svo sem að „fíla“, og nú er sögnin að „læka“ að ryðja sér til rúms.

En ég skellti eiginlega upp úr þegar ég las þetta á dv.is:

Á fæstum ­fjölmiðlum er ekki talið við hæfi að fólk sé að fjalla um hvert um annað og búa til frægðarmenni innanhúss.

Enn held ég að menn séu á einu máli um að tvær neitanir núllist út og verði hið gagnstæða. Þess vegna má skilja „ádeiluna“ svo að á flestum fjölmiðlum sé talið við hæfi að menn fjalli hver um annan.

Ég er ekki viss um að fjölmiðlarnir töpuðu á því að hafa prófarkalesara í sínum röðum. Nema þeir geri stanslaust út á skemmtigildi handvammarinnar. Kannski er góður bisniss í því.

Athugasemdir

[hrafnhildur (IP-tala skráð) 28.2.2013 kl. 08:34]

En eru fjölmiðlar ekki einmitt með prófarkalesara í sínum röðum? Þekki einmitt þann sem les DV :o)

[Berglind Steinsdóttir, 28.2.2013 kl. 23:58]

Eitthvað hefur hann verið syfjaður þegar hann las mánudagsblaðið.

[Hrafnhildur (IP-tala skráð) 1.3.2013 kl. 14:33]

Á sunnudegi - já.