Gamalt kók á nýjum belgjum

Ég fór á fund undir kvöld. Þar voru veitingar í lok fundar. Ég sá á borðum kók nokkurt zero, ákvað að láta mig hafa það að bragða á drukknum - og hann reyndist eins og aðrir þeir sykurlausu kókdrykkir sem ég hef bragðað. Ég hlýt að hafa lélegt bragðskyn.

Miklu eftirminnilegra er það létta hjal sem við tókum upp við gosdrykkjuna um tungumál hinna ýmsu þjóða, þýðingar þar á milli, Wuthering Heights og pólitísk þrætuepli.

Ég set stefnuna á aðalfund Bandalags þýðenda og túlka aftur að ári. Og obbolitlu veitingarnar dugðu ...

Athugasemdir

[Guðrún Þóra (IP-tala skráð) 1.5.2007 kl. 10:52]

Hvað þarf maður að vera til að geta mætt á svona fund? Þarf aðgangsorð?

[Berglind Steinsdóttir, 1.5.2007 kl. 18:50]

Ja, aðgangsorðið er þá líklega 3.000 kr. Ég er félagi, m.a.s. stofnfélagi, og hef þannig komurétt, atkvæðisrétt og málfrelsi.

[Guðrún Þóra (IP-tala skráð) 1.5.2007 kl. 20:32]

Já en ... Hvað þarftu að vera eða gera? Þarf réttindi eða þarftu að framvísa þýddu verki? Eða bara segja, ég er þýðandi 

[Berglind Steinsdóttir, 2.5.2007 kl. 00:29]

Jaaá, kjáni gat ég verið. Mér dugði að segjast vera áhugamaður um þýðingar, mætti á stofnfundinn með Gauta og hef síðan verið félagi. Ég geri ráð fyrir að það sé nóg að vera í náminu eða hafa þýtt (samt milli tungumála, hehe) - eða túlkað.

Svo heyrði ég einn stjórnarmann segja á mánudag að ef fólk heyrðist bara lýsa yfir áhuga sínum væri það umsvifalaust skráð og fengi síðan rukkun í pósti. Engin miskunn!