Hollendingar eiga engan þjóðarrétt

Ég sat á skrafi við Hollendinga í gær. Eins og jafnan fer maður í netta landkynningu, og m.a. hældi ég lambakjötinu okkar, talaði um að mjólkurafurðir væru orðnar að útflutningsvöru og tæpti aðeins á hvalkjöti og hákarli ásamt harðfiski. Svo spurði ég hver væri þjóðarréttur Hollendinga því að ég myndi bara eftir tréklossum og túlípönum, hugsanlega ostum.

Þau sátu tvö á móti mér þegar þetta var og urðu bæði mjög stúrin á svip þegar ég spurði um þjóðarrétt Hollendinga. Hann væri nefnilega enginn, þau væru með kóresk eldhús, japönsk, kínversk, víetnömsk og þau vissu ekki hvað og hvað - en enga eigin þjóðarrétti, ekkert hollenskt eldhús, ekkert til að státa sig af - nema hugsanlega einhverja osta.

Allt í einu rifjaðist upp fyrir mér að Ásgerður bjó í Hollandi í eina tíð og var óskaplega hrifin af Leonidas-súkkulaði. Nei, það er belgískt. Alveg rétt.

Og ég held að ég hafi farið langt með að eyðileggja fyrir þeim kvöldið því að þau héldu áfram að rifja upp fyrir hvað Holland væri frægt úr því að það ætti enga matarhefð. Það eru eiturlyf og rauða hverfið sem er einmitt svo löglegt að starfsmenn þess eru með eigið stéttarfélag og hafa verkfallsrétt!

Samúð mín var óskipt (en ég fór ekkert að segja þeim að hjá Transparency International erum við hrunin úr fyrsta sæti þjóða með litla spillingu í stjórnsýslunni og ofan í það sjötta).

Athugasemdir

[Ásgerður (IP-tala skráð) 1.10.2007 kl. 08:52]

Hmm... það hefði verið hægt að minna þau á rookworst og stamppot sem mér þótti mjöööög góður réttur á köldum vetrarkvöldum ... en líklega er það ekkert sem þeir vilja vera frægir fyrir.  Annars á ég hollenska matreiðslubók með réttum bændanna - sem eru mjög hollenskir (þ.e. réttirnir!!). Þar er svínakjöt, grænkál og kartöflur í aðalhlutverki ásamt fersku kryddi - allt mjög hollenskt. ... Ætti ég að deila þessum uppskriftum með hnípnum Hollendingunum?

En þetta er alveg rétt, Hollendingar eru eiginlega frægir fyrir gott eldhús útlendinganna sem sest hafa að í landinu, t.d. indónesískt og indverskt. ... þar græddi Holland nú heilmikið!

[Berglind Steinsdóttir, 1.10.2007 kl. 09:13]

Já, ég man reyndar núna að þau töluðu um einhvern kartöflurétt - en alls ekki rookworst eða stamppot (hvurs lags tungumál, rok og stamp ...?). Græddu Hollendingar ekki indónesísku réttina þegar þeir voru herraþjóðin í langtíburtistan? Hmm.

[Ásgerður (IP-tala skráð) 1.10.2007 kl. 23:59]

hmmm.... svei mér þá, ég held bara að Hollendingarnir hafi verið of vitlausir (eða góðir með sig) til að taka matargerðarlist Indónesanna með sér heim. Ég held að ég fari rétt með þegar ég segi að það voru Indónesarnir sem fluttu uppskriftirnar með sér og opnuðu veitingastaði í landi herraþjóðarinnar.