Jólabókaflóðið fellur að

Ég fékk fyrsta þefinn af jólabókalestri í kvöld. Mér var reyndar hálft um hálft boðinn Harðskafi Arnaldar til láns í hádeginu en sökum ófyrirgefanlegs athugunarleysis míns láðist mér að þekkjast það góða boð.

Í kvöld lá leið mín á Bókasafn Hafnarfjarðar sem stendur fyrir Kynstrunum öllum. Fimm höfundar lásu úr bókum sínum og heillaði mig sú sem ég átti síst von á. Það var mikil öndvegisstund í miklum þrengslum og nú er ég staðráðin í að lesa Bíbí sem ég var áður staðráðin í að lesa ekki. Það má vel vera að ég heillist ekki af spágáfunni en Vigdís Grímsdóttir hitti í mark með lestrinum.

Svo mun ég spennt lesa Sautjándann eftir Lóu Pind Aldísardóttur sem ég þekki að góðu einu úr fréttum. Í bókinni sinni var hún búin að vopnvæða strandlengjuna sem er heldur nöturleg framtíðarsýn. Þess þá heldur er manni hollt að vera undir innrásina búinn ...

Athugasemdir

[Ragnheiður Ólafía Davíðsdóttir, 23.11.2007 kl. 16:42]

Þér er sannarlega óhætt að lesa Harðskafa. Mér finnst þetta ein besta bók Arnalds. Þá mæli ég með Rimlum hugans og nýju bókinni hans Hrafns Jökulssonar.

[Berglind Steinsdóttir, 23.11.2007 kl. 22:36]

Er ekki bókin hans Hrafns mest fyrir brottflutta Strandamenn ...? Hinar bækurnar les ég klárlega, og margar fleiri. Fékk Himnaríki og helvíti eftir Jón Kalman Stefánsson á bókasafninu í dag. Hlakka til að byrja á henni.

[Ragnheiður Ólafía Davíðsdóttir, 25.11.2007 kl. 11:54]

Ég er nýbyrjuð á Bíbí og hún lofar svo sannarlega góðu. Jú, "þar sem vegurinn endar" er vissulega um Strandamenn en líka fyrir áhugafólk um galdratrú. Krummi hefur lagt mikla vinnu  í heimildaöflun. Hefði gjarnan viljað heyra meira af Krumma sjálfum en miklu púðri er varið í ættfræði í bókinni á kostnað bráðskemmtilegra lýsinga á sveitareynslu Krumma.