Stattu upp en sittu á meðan

Ef maður skyldi verða atvinnulaus og alls ekki fá aðra vinnu gæti hann reynt að nýta tímann til að endurmennta sig. Hann gæti líka nýtt tímann til að horfa á Skjá1 og sjálfsagt fleira. Ef Ísland gengur t.d. í Evrópusambandið gæti snögglega orðið brýn þörf fyrir þýðendur.

Nú berast þau boð að framlög til menntamála skuli skert, fólki þannig ekki gert kleift að nýskrá sig í t.d. Háskóla Íslands og á sama tíma er einhver sem hvetur fólk til að skrá sig ekki atvinnulaust og þiggja (held ég) 136.000 á mánuði til varanlegrar eignar heldur mennta sig frekar til framtíðar og þiggja endurkræf námslán.

??

Hlustaðu með eyrnatöppum. Sofðu meðan þú vakir. Lestu autt blað. Borðaðu það sem úti frýs - og smjattaðu á góða bragðinu!

Já, mér finnst þversögn í því að hvetja fólk til að mennta sig um leið og alls staðar er dregið úr öllum möguleikum til þess.

Athugasemdir

[Sigurjón Þórðarson, 21.12.2008 kl. 15:24]

Ruglið í varaformanni Sjálfstæðisflokksins sker í eyrun en hún hefur haldið því fram að  HÍ gegnir gríðarlegu mkilvægu hlutverki til framtíðar litið við uppbyggingu en samt sem áður á að skera niður fjárframlög til HÍ.

Nýjustu fréttir herma að "endurreisnarstarf" Íslendinga í Afganistan haldi áfram eftir bankahrunið eins og ekkert hafi í skorist.

[Berglind Steinsdóttir, 21.12.2008 kl. 22:45]

Nú herma reyndar nýjustu fréttir að til standi að efla HÍ, ég gat ekki skilið fréttatíma kvöldsins betur. Það er gott þegar menn sjá að sér.

[Helga (IP-tala skráð) 21.12.2008 kl. 22:53]

Nei, Berglind, nú held ég að Pollýanna hafi náð tökum á þér. Ég held að það eigi ekki að efla skólann heldur að sleppa honum við að skera eins mikið niður og upphaflega var gert ráð fyrir í fjárlögum.

[Berglind Steinsdóttir, 21.12.2008 kl. 23:00]

Já, það er líklega rétt hjá þér. Fyrst er gefið í í fjárlagafrumvarpi, svo er dregið úr og svo aftur sett inn dúsa. Og þannig tókst að villa mér sýn.

[Ásgerður (IP-tala skráð) 22.12.2008 kl. 22:24]

hahaha! Aldrei slíku vant er ég sammála Sigurjóni! :-) Ruglið í menntamálaráðherra er yfirgengilegt og það versta er ... allt of fáir sjá í gegnum vitleysisganginn í henni og finnst hún frábær!