Er bensínverðsamkeppni horfin yfir móðuna miklu?

Eru Atlantsolía, ÓB og Orkan hætt að veita N1, Olís og Skeljungi heilbrigða samkeppni? Og umræðan dáin drottni sínum líka?

Mig vantar helling af bensíni í dag og fletti því upp á heimsíðum félaganna til að glöggva mig á verðinu. Vissulega munar allt að fjórum krónum á lítranum. En setjum sem svo að tankurinn taki 50 lítra, þá er munurinn á 183 (50x183=9.150) og 187 (50x187=9.350) 200 krónur. Og ég myndi ekki taka á mig krók fyrir 200 krónur, enda mega menn ekki gleyma að krókurinn kostar líka. Svo vilja félögin átthagabinda menn með sérmerktum kortum og lyklum sem veita einhverra króna afslátt. Ég kann þeirri tilhugsun illa.

Ég gruna olíufélögin um að vera í innbyrðis krosseign.

Athugasemdir

[spritti (IP-tala skráð) 27.7.2009 kl. 14:16]

Grunar þig olíufélögin um að vera í innbyrðis krosseign. Þau eru það.

[Berglind Steinsdóttir, 27.7.2009 kl. 17:25]

Ég veit, ég hefði átt að tala um rökstuddan grun.

Svo endaði ég hjá Olís og lét ræna mig.

[Ásgerður (IP-tala skráð) 28.7.2009 kl. 11:04]

Hmmm... Nú lýsi ég yfir fávisku minni og spyr: hver á olíufélögin? Hver á t.d. Atlantsolíu?

[Berglind Steinsdóttir, 28.7.2009 kl. 18:16]

Aa, það veit ég ekki, ég sá bara að ÓB er á mála hjá Olís:

Félagið rekur fjölda þjónustustöðva undir vörumerki Olís ásamt sjálfsafgreiðslustöðvum undir vörumerki ÓB - ódýrt bensín.

Er farið fram á Atlantsolíukort á öllum sölustöðum þeirra? Ég hrökklaðist burtu frá einni út af því.