Áhlaup hafið

Lengi hefur mér boðið við framkomu fyrrum yfirmanna Kaupþings, og Sigurður og Hreiðar ýttu mér persónulega yfir til sparisjóðs. Um daginn var ég svo flutt hreppaflutningum yfir í Kaupþing aftur og nytsami sakleysinginn ég ákvað að gefa núverandi yfirmönnum tækifæri til að sanna sig.

Ó svei.

S24 hefur ekki klikkað hingað til og nú set ég allt mitt traust á þann netbanka, endurnýja greiðslukortið og legg platínukortinu sem Kaupþing prangaði inn á mig. Ítreka þó það sem ég hef áður sagt að afgreiðslufólkið hefur verið lipurt.

Athugasemdir

[Lára Hanna Einarsdóttir, 2.8.2009 kl. 22:26]

Hver á S24?

[Berglind Steinsdóttir, 2.8.2009 kl. 22:33]

Æ, ég veit, hann byrjaði sem deild í Sparisjóði Hafnarfjarðar og nú er hann í eigu Byrs. Ég er líka búin að renna hýru auga til MP en hef ekki reynt S24 að neinu misjöfnu þannig að ... Ég er alveg uppgefin á að vera svona tortryggin.

[Lára Hanna Einarsdóttir, 3.8.2009 kl. 01:49]

Hvað með Sparisjóð S-Þingeyinga - (minnir mig)? Hann var í fréttunum í fyrra fyrir að vera einn af fáum bönkum sem tók ekki þátt í geðveikinni og stendur bara firna vel.

Ég hef verið að íhuga flutning þangað - þarf að inna Dagnýju Reykjalín nánar eftir þessu, hún minntist á þetta í haust.

[Berglind Steinsdóttir, 3.8.2009 kl. 09:25]

Ég veit bara ekki hvort lítill sparisjóður með litla áherslu á fjárstýringu (held að Hrun 103 hafi kennt mér þetta tungumál) hefur áhuga á öllum þeim viðskiptum sem Kaupþing missir núna. Og þó, þegar betur er að gáð býður hann mann velkominn í viðskipti.

Nú er ég búin að vera svo lengi að skrifa þessa athugasemd að ég er eiginlega búin að ákveða að slást í hóp með Þingeyingum. Habbðu þökk fyrir!

[spritti (IP-tala skráð) 4.8.2009 kl. 00:54]

Ég hefði troðið kortinu upp í rassgatið á þjónustufulltrúanum.

[Berglind Steinsdóttir, 4.8.2009 kl. 07:08]

Sinn er siður í hverju landi - en ég hef aldrei verið með þjónustufulltrúa. Hvar geymir þú annars öngulinn ...?

Hins vegar er ég búin að átta mig á að ég er enn meðvirk, ég borgaði í gærkvöldi reikning frá ríkinu sem á stóð bara ríkissjóðstekjur - hvað var ég að borga? Tryggingagjald? Gleðiskatt? Þetta er árviss atburður hjá verktökum (held ég) og ég man það aldrei á milli ára. Og ekki er upplýsingum spreðað, í þetta skipti kom reikningurinn bara í heimabankann, e.t.v. daginn fyrir gjalddaga, e.t.v. á gjalddaga, og kemur kannski í pappírsformi í dag. En kannski ekki, og kannski ekki með þeim upplýsingum sem mér finnst vanta.

Helv. meðvirkni.