kurteisin uppmáluð

Sunnudagur, 30. ágúst 2009

Hvað eru fjármagnstekjur?

Segjum að ég leggi milljón inn á reikning með 10% ársvöxtum. Eftir ár stendur milljónin í 1.100.000. Á sama tíma hefur verðbólgan mælst 11%. Eru fjármagnstekjur mínar þá raunverulega 100.000 krónur? Eða eru þær þvert á móti neikvæðar af því að ég fæ minna fyrir 1,1 milljón en ég fékk fyrir milljón árinu áður?

Skattur af raunverulegum fjármagnstekjum má mín vegna hækka, en ég vil fá skýra skilgreiningu á fjármagnstekjum.

Berglind Steinsdóttir

Flokkur: Dægurmál | Facebook

Athugasemdir

Ef ársraunvexti eru neikvæðir eins og kemur fyrir þá eru engar vaxtatekjur bara tap af starfseminni.

Það ætti síðan að fást yfirfært til næsta árs eins og önnur töp af starfsemi.

Ég hef alltaf litið svo á að það væri óeðlilegt að greiða fjármagnstekjur af vertryggingu, aðeins að greiða skatt af vöxtum ef þeir eru jákvæðir.

Síðan ef fara á að auka skattlagningu af sparifé eins og hverjar aðrar launa tekjur þá þarf að athuga hvernig sparnaðurinn verður til. Venjulegur sparnaður fólks eru launatekjur sem búið er að greiða einu sinni skatt af. Þannig að til þarf að koma einhvers konar lágmarksviðmið eða persónuafsláttur.

Þorsteinn H. Gunnarsson, 30.8.2009 kl. 09:31

Já, ég var bara með svona venjulegan launamann í huga. Fjármagnstekjuskattur var 10% en hækkaði upp í 15% í sumar og var þá strax tekinn af meintum fjármagnstekjum. Og ég man ekki betur en að skatturinn hafi alltaf verið tekinn af verðbótaþættinum líka.

Berglind Steinsdóttir, 30.8.2009 kl. 09:43

Ósköp eðlilegt að velta þessum málum upp.

Þrátt fyrir alla "fræðinga" í þjóðfélaginu hefur íslenska "fjármálakerfið" þróast í öfuga átt við það sem gerist hjá flestum (öðrum) siðuðum þjóðum. Stóru vandamálin eru misvitrir pólitíkusar sem bar og ber að skapa þær aðstæður hér á landi sem aðrar þjóðir búa við í sínum heimahögum. Verðbólgan hefur alla tíð verið vandamál hér á landi (svo lengi sem ég man) og í stað þess að taka á þeim þætti á vitrænan hátt, hefur ein af aðgerðum pólitíkusa verið sú að fara út í "seðlaprentun" í formi verðtryggingar, þessir "loftbólupeningar" (verðbætur) eru svo skattlagðir um 15% í dag, auk þeirra ræfilslegu sem við fáum í launaumslagið og reynum að ávaxta á einhvern hátt. Íslenska "bankakerfið" er allt of stórt og kostnaðarsamt, með alla sína stjóra og aðstoðarstjóra, fulltrúa og aðstoðarfulltrúa, ráðgjafa, aðstoðarmenn og fleiri. Verðbréfasjóðir á hverju horni með alla sína "fjármálasnillinga". Hvers virði er svo blessuð íslenska krónan okkar, þrátt fyrir allt báknið ? Það er best að gera sér ekki vonir um að við getum "sparað og ávaxtað", eins og flestum (öðrum) siðmenntuðum þjóðum hefur tekist, ef "báknið vex" og "prentun verðlausra peninga" heldur endalaust áfram á landinu bláa. Það má skrifa um "fjármálaheimsku Íslendinga" í marga daga, en látum nægja að aðrar þjóðir geri endalaust grín að okkur.

Eina leiðin til að spara, var að skipta "íslensku loftbólukrónunni" í alvöru gjaldmiðil og koma honum fyrir í erlendum banka, svona eins og "allir mektarmenn" gerðu, en nú er það víst orðið of seint.