Jarðböðin í Mývatnssveit

Áður en ég fór með þýsku farþegana mína hringinn hafði ég í hyggju að stinga upp á ferð í Jarðböðin af því að mér sýndist við hafa góðan tíma í Mývatnssveit. Á daginn kom svo að ég hafði annað plan í höndunum en þau og Húsavík með hvalaskoðun, Tjörnes, Ásbyrgi og Dettifoss bættist við daginn sem ég ætlaði að stinga þeim í lón.

Daginn eftir ákvað ég því að við keyrðum að böðunum og litum á þau. Þá var ekki búið að opna hálftíma eftir auglýstan opnunartíma, matarleifar voru á veröndinni og engin önnur ummerki um mannaferðir. Þarna stóð ekki til að selja þeim neitt - en helv. hefði það líka verið erfitt. Og það er ekki eins og það taki því ekki að rukka, auglýstur aðgangseyrir er 2.500 kr.

Hefur einhver tekið sprettinn í norðurlóninu?

Landeyjahöfn

Ég hef ekki heyrt neinn veina yfir landgrunninu í Landeyjahöfn nema einn núna í fréttatímanum. Það var fyrirsjáanlegt að það tæki tíma að ná kúrsinum. Það er engin náttúruleg höfn þarna og það mun áfram þurfa að dæla upp sandi. Ég held að vinnan þarna sé góð og ég hlakka mikið til að fara til Eyja, vonandi í náinni framtíð.

Hafa menn ekki tekið eftir sanddælunni í Reykjavíkurhöfn? Er ekki eitthvað svipað gert á Grundartanga?

Áfram Vestmannaeyjar!

Minni svo á að fuglinn í Eyjum er lundi en ekki kría ...

Engu logið upp á Austfjarðaþokuna

Þokan var svo þéttstrengd á milli Egilsstaða og Neskaupstaðar í gær að hægt hefði verið að hengja þvott á hana. Á ég að trúa að ófrískar konur séu sendar í klukkutímarússibana á ögurstundu? Aksturinn tekur klukkutíma við bestu aðstæður. Núna er hásumar. Og Oddsskarðið er einbreitt!

Er þetta pólitík?

Ákall til samgönguráðherra

Það þarf að laga Dettifossveg.

Ég fór þar í dag (reyndar á lágri lúxusrútu með eldhúsi í skottinu) en við gátum lengi dags ekki keyrt hraðar en á 20. Þetta eru ekki einu sinni ýkjur. Farþegarnir buðust til að skrifa Verkehrsminister bréf til að segja honum að þetta væri ekki gott fyrir ferðaþjónustuna. Við rétt náðum kvöldmatnum!

28 evrur í Bláa lónið!

Þegar aðgangseyrir í Bláa lónið er orðinn 4.600 krónur eða hvað mér var sagt í símann í dag, 28 evrur í þýðingu, get ég ekki með nokkru móti mælt með því við túristana mína. Ég segi þeim auðvitað frá þessu þegar þeir spyrja en hvet þá til að fara í sund.

Svo kostar 800 kr. að leigja handklæði!

Ég held að Bláa lónið muni verðleggja sig út af markaðnum nema það sé beinlínis að reyna að hrista af sér lausatraffíkina. Ég þykist nefnilega vita að það sé skömminni skárra að kaupa pakka fyrirfram.

317.630

Þar sem ég stóð í guðdómlegu veðri við Laugarvatnshelli í gær og lagði spurningar fyrir nemendur í breskum piltaskóla varð ég fyrir þeirri undarlegu reynslu að kona vék sér að mér og leiðrétti svarmöguleikana sem ég gaf. Ég þrætti lítillega við hana og þakkaði henni svo fyrir.

Ég held að ég sé bæði of kurteis og of umburðarlynd.

Ég hef heldur aldrei lent í svona áður.

Fyrsta spurningin var um mannfjölda. Ég hafði sagt þeim á fyrsta degi að hér byggju 317.000 manns og að ég námundaði upp í 320.000. Margir tala um 300.000 hef ég heyrt og ég hef líka heyrt að fólk talar um Hvannadalshnjúk sem 2000 metra tind. Konan sagði að 1. desember sl. hefðu búið hér 309.000, ég væri augljóslega með töluna frá því fyrir hrun.

Maður hefur val um ónákvæmni.

Svo fletti ég upp á hagstofuvefnum eins og ég gerði áður en ferðin hófst. Og Hagstofan heldur því fram að 317.630 manns hafi búið hér 1. janúar sl. (uppfært reyndar 16. mars). Árið áður bjuggu hér 319.368.

Auðvitað getur maður haft skoðanir á og efasemdir um opinberar stofnanir en maður verður að miða við einhverja tölfræði sem þær gefa út.

Hafa kindurnar breyst?

Mér finnst endilega að ég hafi átt í standandi vandræðum með að fá kindur til að brosa framan í myndavél en mér tókst núna í vikunni að jarma til mín kind sem ætlaði bara inn í myndavélina mína. Er bilið að styttast?

Staðbundið veður (skyggni ágætt á húfunni minni)

Ég er svo mikill Reykvíkingur að ég hneigist til að skoða veðurspána út frá höfuðborginni. Um helgina var ég á hinum dýrlega stað Hellu og þar var allt annað veður en í Reykjavík - en ekki bara það, allt annað veður en í Hveragerði og á Hvolsvelli.

Í gær rigndi dropum á stærð við badmintonkúlur, reyndar sæmilega hlýjum þannig að ekki fór illa um okkur í sundi og víðar. Og ég sver að ég hugsaði og sagði: Gott, þá hreinsast kannski eitthvað askan undir Eyjafjöllum. Svo heyri ég í fréttum í kvöld að Þorvaldseyri hafi farið á mis við alla rigningu í lægðunum ógurlegu. Hnuss.

Og nú er ég spennt að vita hvað gerist næstu vikuna. Rís Eyjafjallajökull eða hnígur? Hvessir eða lægir? Siglir Herjólfur í Landeyjarnar? Er Fjaðrárgljúfur á sínum stað?

Bæjarstjóraskipti

Ég er að reyna að tapa mér ekki í smáatriðum en get ekki látið vera að velta fyrir mér hvort fráfarandi bæjarstjóri í Hafnarfirði verði ekki á biðlaunum út árið, svo nýi bæjarstjórinn í einhvern tíma þegar hann hættir eftir tvö ár og ef sá þriðji skyldi hætta í lok kjörtímabilsins hlýtur hann líka að fá biðlaun í einhverja mánuði.

Skipta bæjarstjórar kjörtímabilinu á milli sín með hag bæjarbúa í huga? Hahh.

Veður og klætt fólk

Í gær sannreyndi ég að það er „ekkert til“ sem heitir vont veður, bara misjafnlega (vel) klætt fólk. Ég var í hópi þess fólks sem var ekki klætt eftir veðri (sú eina reyndar) og afsaka mig með því að ég fór í tvær heimsóknir áður en gangan brast á og þess vegna kaus ég að trúa því að veðrið yrði betra og þurrara þegar á reyndi.

En - en mér var alveg sama þótt ég blotnaði. Þegar ég kom heim reif ég mig úr öllu og henti beint í þvottavélina. Hins vegar trúi ég á illsku vonda veðursins ef maður skyldi - jafnvel vel búinn - ætla að lúra í tjaldi dögum saman í rigningu. Líka get ég krossbölvað miklu votviðri ef maður er á ferð í rútu, jafnvel á malarvegum þar sem eðjan sullast upp um allar rúður og maður sér ekki út - og svo fer maður út og svo kemur maður blautur inn, fer úr blautri yfirhöfninni og vætan þéttist innan á rúðunni - og reynið að segja mér að þetta sé ekki dálítið og allt að því talsvert leiðinlegt.

En það var sko ekkert leiðinlegt að slæpast í góðum félagsskap í rigningu í Reykjadalnum í gær. Bara gaman. En grey fólkið með gleraugun og engar vinnukonur á rúðunum.

 

Same old, same old

Ég fór í dagsferð sem leiðsögumaður, fékk yfirlit yfir launin, gerði athugasemd við það að mér væru greiddir 10 tímar í dagvinnu, sagði að ég ætti að fá 8 tíma í dagvinnu og 2 í yfirvinnu - og fékk þetta svar:

Venjulega er Gullhringur 8 til 8,5 klst. og ætti því að greiða 8 til 8,5 klst. í dagvinnu fyrir Gullhring en vegna þess að leiðsögumenn þurfa að mæta áður en ferðin hefst og alltaf hleypur á einhverjum mínútum, tíu eða svo, þegar þeir koma tilbaka er ákveðin vinnuregla hér hjá XXX - allavegana í XXX - að greiða fast gjald á virkum dögum fyrir Gullhringinn 10 klst. þannig að í raun ættum við að greiða 8 til 8,5 klst. fyrir Gullhringinn en við viljum koma til móts við leiðsögumenn og greiða þeim fyrir að mæta fyrr og þess háttar þannig að við greiðum fast 10 klst. fyrir Gullhringinn.

Ef við mundum ekki hafa þessa reglu hjá okkur  mundum við hafa max 8 klst. en þá munduð þið aldrei frá greitt fyrir að mæta fyrr. En rétt er að dagvinna er max 8 klst. og eftirvinna eftir það. En ef við mundum greiða ykkur eftir því þá fengjuð þið minna greitt fyrir t.d. Gullhring þar sem við þá mundum einungis greiða fyrir ferðina sem Gullhringurinn er. Á þennan hátt viljum við koma til móts við ykkur og greiða ykkur fyrir allar þær klst. sem þið vinnið fyrir okkur - frá því að þið mætið XXX.

Ég þreytist ekki á að undra mig á því að leiðsögumenn sætti sig við að fá ekki greitt eftir kjarasamningum.

Ég svaraði:

Þetta er sérkennileg vinnuregla og mig furðar að leiðsögumenn sætti sig við þessa útleggingu. Ef ekki ætti að greiða fyrir undirbúningstímann á XXX ættu leiðsögumenn að mæta beint í rútuna, er það ekki? Ég var mætt kl. 7:30 og komin til baka kl. 17:20 - af hverju ætti ég ekki að fá greitt fyrir vinnutímann minn?

Ég er líka með vinnureglu, ég vinn ekki fyrir fyrirtæki sem borga ekki a.m.k. eftir kjarasamningum. Ég sé ekki eftir að hafa farið með farþegana af XXX og XXX af því að þeir voru sannarlega skemmtilegir og þægilegir í alla staði en eins og gefur að skilja hefði ég ekki farið ef ég hefði kynnt mér það að vinnureglan ykkar er að borga ekki að lágmarki rétt laun.

Ég bið þig að taka mig af úthringilistanum ykkar því að annars yrði svar mitt eftirleiðis: Sama og þegið, ég ætla ekki að vinna yfirvinnu á dagvinnulaunum sem þið lítið m.a.s. á sem sérstaka greiðasemi.

Svo bið ég sérstaklega vel að heilsa minni kæru XXX sem hefði getað sagt þér að ég brygðist svona við.

Mér finnst ég alveg kurteis og ég er næstum hætt að pirra mig á svona vinnubrögðum sem er kannski ógott því að maður á að veita mótspyrnu þegar meiningin er að hlunnfara mann og greiða ekki einu sinni eftir kjarasamningum.

Ég var fyrir mörgum vikum beðin um að vinna fleiri daga hjá téðum aðila í sumar en ég sagðist ekki vilja ráðstafa stökum dögum svona langt fram í tímann. Það er nefnilega önnur vinnuregla hjá mér, ef ég er búin að segja já hætti ég ekki við af því að eitthvað annað býðst.

Ég eyði bara sumarfríinu mínu í eigið rölt um gresjur landsins.

Eigin hagsmunir/eiginhagsmunir

Einhvern veginn finnst mér að fólki sé jöfnum höndum legið á hálsi fyrir að vera ekki í þeirri vondu stöðu sem fólk er almennt í og því borið á brýn að geta ekki sett sig í spor þeirra sem eru ofurskuldsettir, atvinnulausir o.s.frv. og fyrir að vera í þeirri sömu stöðu og þá eins og það gangi bara eigin erinda ef það hefur ákvörðunarvald.

Stjórnmálamenn þurfa fyrst og fremst að sýna að þeir meini að almennir hagsmunir gangi framar sérhagsmunum, að almennar reglur gildi fyrir alla, líka þá og vini þeirra, en það er ósanngjarnt að sumir skammi stjórnmálamenn fyrir að vera með gengistryggð lán og að aðrir skammi þá sem eru ekki með þau fyrir að vera ekki með þau.

Ef ég hefði fengið boðaða heimsókn fyrir sveitarstjórnarkosningarnar hefði ég sett það fram sem mína helstu tillögu að stjórnmálamenn settu almennar reglur (auðvitað gagnlegar og í ljósi breyttra tíma) FYRIR ALLA. Ef það hefði verið gert og ef það væri gert sætu allir við sama borð og engum væri hyglað. Útboð vegna verkefna, stöðuveitingar, lánveitingar, sala ríkiseigna - lausnin blasir við. Ísland er auðugt land, Íslendingar eru menntaðir og við gætum öll verið í jafnvægi og vel sett ef græðgi og sérreglur fárra hefðu ekki sett svo marga á hliðina.

Ég var með fleiri tillögur en þær sneru helst að sveitarstjórnarmálum.

Gangan á Akrafjall

Á vef Akranesbæjar er þessi lýsing á göngu upp á fjallið, mjög gagnleg:

Akrafjall og umhverfi þess er sannkölluð paradís fyrir útivistarfólk.  Gönguferð á fjallið er tiltölulega auðveld og útsýnið ægifagurt.  Fjallið gnæfir eins og útvörður byggðarinnar á Skipaskaga.  Það er sporöskjulöguð og formfögur fjallabunga sem stendur á nesinu á milli Hvalfjarðar og Leirárvogs.  Talið er að fjallið sé gömul eldstöð, en jökull hafi gengið yfir það og sorfið af því allar hvassar brúnir landmegin, en síðan steypst fram dal sem klýfur það vestanmegin og nefnist Berjadalur.  Bungan sunnan í hlíðum dalsins heitir Jókubunga.  Eftir dalnum rennur Berjadalsá.  Norðan árinnar kallast fjallið Norðurfjall og sunnan hennar Suðurfjall.  Sitt hvoru megin dalsins rísa tveir tindar.  Heitir sá nyrðri og hærri Geirmundartindur (643 m) en hinn syðri Háihnúkur (555 m).  Guðfinnuþúfa er drangur neðan Geirmundartinds.  Meginefnið í fjallinu er basalt, en víða eru rauðleit móbergslög milli blágrýtislaga.  Greinilegar sjávarmyndanir finnast umhverfis fjallið og í því, þær hæstu ofan við bæinn Kúludalsá í 70 m hæð.  Hvalbein hafa fundist í 80 m hæð við bæinn Fellsenda. 

Það sem okkur fannst skondið á staðnum var að Guðfinnuþúfa var ekki síðri drangur en Geirmundartindur. Má leggja út af því? Svo er ekki getið um sérstakt áhugamál Skagamanna, mótorhjólaþeytur. Við reyndum að ímynda okkur háværa býflugu en það gekk ekki til lengdar. Ferðin var samt algjörlega vel heppnuð.

 

Starfandi stjórnarformaður?

Mér finnst ekki sjálfsagt að þetta fari ekki saman, ég meina eiginlega málfræðilega. Mér finnst eins og þetta þýði eingöngu að stjórnarformaðurinn vinni - og enginn getur amast við því. Í raunheimum þýðir þetta þó að stjórnarformaðurinn sé líka ráðinn í starf hjá viðkomandi stofnun.

Eða hvað?

Og einhver uppástóð í gær að það væri ekki löglegt. Eða hefði átt að verða ólöglegt. Jafnvel að það hefði kannski staðið til en ekki orðið af.

Minnir mig á fjölmiðla sem byrja fyrirsagnir á: Bankarnir rétta úr kútnum - og svo kemur skilyrt framhald: ef menn hætta að koma sér undan því að borga ólöglega reikninga. Bara tilviljunarkennt dæmi tekið utan úr himingeimnum. Ég hef margoft orðið vör við að fólk heyrir bara byrjunina og heldur síðan að þessi hugsanlegi möguleiki sé hreinn og klár sannleikur.

Óskýrt? Welcome to my world ...

Spánarsnigillinn var svartsnigill

Sem ég fór í væna göngu upp á aflíðandi fjall í fyrradag lærðist mér að þar væri að finna ógeðslegan snigil. Sjálf hef ég mikið umburðarlyndi gagnvart ógeðslegum sniglum sem mér býður bara ekki neitt við, kann sennilega ekki vont að forðast. Og við hittum fyrir í votlendi svona líka viðbjóðslegan spánarsnigil, og sögur voru rifjaðar upp af viðlíka kynnum. Jæks.

Svo fór samt einhver að fletta í gegnum veraldarvefinn þegar heim er komið - og viti menn, viðbjóðslegi spánarsnigillinn reyndist ógeðslegur svartsnigill.

Og það er ljómandi gott fyrir leiðsögumenn að verða einhvers vísari ...

Þetta gæti þó útskýrt misskilninginn:

Svartsnigill getur frjóvgað sig sjálfur en kýs þó að makast við aðra einstaklinga. Á seinni árum hefur komið í ljós að svartsnigill getur auk þess verið fjöllyndari en góðu hófi gegnir. Hann á það nefnilega til að makast við spánarsnigil og geta af sér afkvæmi með honum sem hafa reynst harðger og kuldaþolin.

Baggalútur á HM?

Baggalútur nær að skemmta mér þrátt fyrir fjarveru sína:

Jæja. Komnir í ZemiZemi þjóðgarðinn. Enter dottinn í það. Eyddi klukkutíma í að rökræða hjónaband manns (sitt) og gnýkýr við gædinn.

Gnýkýr! Í eignarfalli. Rétt. *ánægjuandvarp*

---

Og svo sprettur vel undir Eyjafjöllum - þarf meira til að gleðja mann í bili?

Mismæli

Það var alþekkt(?) að þeir sem vildu fá góðan lestur á auglýsingar sem voru hengdar upp í sjoppum (eru þær aflagðar?), t.d. um að barnapía óskaðist eða að kommóða væri til sölu, laumuðu inn eins og einni villu, ásláttar- eða stafsetningarvillu. Þá var öruggt að allir lásu auglýsinguna í þaula til að leita að fleiri villum og býsnast svolítið.

Nú þegar menn fjargviðrast mikið yfir villunni í þjóðhátíðarræðunni fer ég að velta fyrir mér smjörklípuaðferðinni; er eitthvað í ræðunni sem við áttum ekki að staldra við (og þá virkaði Dýrafjörðurinn) eða eiga lesendur að leita að fleiri villum og lesa þar með ræðuna í þaula?

Kenning Greips Gíslasonar, eðal-Ísfirðings, á Bylgjunni áðan var líka góð, að forsætisráðherra væru Dýrafjarðargöngin svo hugleikin ... 

Vettvangurinn

Það er nýjasta samsetningin sem ég tek eftir að sé notuð seint og snemma. Eitthvað er gert/hugsað á vettvangi

borgarstjórnar

þingsins

Alþjóðahvalveiðiráðsins

nefnda

formanna flokka!

ríkisstjórnarinnar

einkaréttar!

iðnaðar

barnaverndarnefnda og meðferðarheimila.

Þessi dæmi eru bara brot þeirra sem ég fann ... á opinberum vettvangi.

Meiri hluti vs. minni hluti

Stjórn vs. stjórnarandstaða. Löngum höfum við upplifað víða svo ómarkvissa stjórnarandstöðu, rifrildiskennda, ómálefnalega og lausa við uppbyggingu að ég held að við höfum gleymt að stjórnarandstaða á að veita aðhald. Gagnrýni er ekki neikvæð í eðli sínu, óorði hefur bara verið komið á gagnrýni.

Nú þegar borgarstjórn er búin að skipta með sér verkum og öll dýrin í skóginum ætla að vera vinir - sem ég ætla ekki að kvarta yfir - gæti verið að reyndi á hinn almenna borgara að veita málefnalegt aðhald. Þá er vefurinn sem settur var upp gagnlegur.

Er enn sérstakur framkvæmdastjóri miðborgarmála? Ég veit um mann sem langar mikið að vita hvort þetta tímabundna stöðugildi sem sett var á laggirnar fyrir tveimur árum er enn við lýði en kemur því ekki í verk að hringja í Ráðhúsið og spyrja. Og ég er sennilega ekki nógu áhugasöm til að taka af honum ómakið.

Villa í sjónvarpinu

Norskur þáttur var að klárast og ítölsk bíómynd að byrja. Var ekki búið að lofa mánuði af HM ...?