Þarf virkilega virkilega virkilega VIRKILEGA ekki að auglýsa stöðu forstöðumanns Þjóðmenningarhúss?

Ég trúi ekki mínum eigin augum.

Sólarferð Guðmundar Steinssonar

Ég sá forsýningu í fullum sal Þjóðleikhússins og var ekki eins hrifin og ég gerði mér vonir um. Vissulega á sýningin eftir að þéttast - og vissulega hló ég samt oft. Ég sat líka á milli Ásgerðar hláturpoka og annars Guðmundar Steinssonar og þau smituðu mig með gleði sinni. Búningar og leikmunir voru svo eitís (jafnvel seventís?) að við féllum alveg í stafi, það vantaði ekkert upp á lúkkið. Ég hafði gaman af leikurunum - efasemdir mínar snúast um leikritið.

Tvenn hjón fara til Mæjorku að njóta sólar og ódýrra áfengra drykkja (ekki pina colada, ekki tia maria, þeir hétu eitthvað annað). Við dveljumst mikið inni í herbergi Stefáns og Nínu og mikið óskaplega lifa þau innantómu lífi, a.m.k. í þessu sumarfríi. Svona voru sólarferðirnar er manni sagt, lúxusinn var að komast í sólarfrí þar sem ekkert átti að gera annað en að sóla sig, brenna hæfilega og svala þorsta sínum í áfengum drykkjum.

Þegar önnum kafið fólk lítur upp úr önnum sínum uppgötvar það stundum að það á ekki það sameiginlegt sem það hafði talið. Það getur verið kjörlendi fyrir leikrit; samtöl, stefnubreytingar, uppgjör. Mér þótti ekki nóg af þessu.

Kannski var ég móttækilegri þegar Stundarfriður fór á svið. Það leikrit þótti mér snerta kviku og ég vonaðist eftir svipaðri upplifun. Ég er líklega bara orðin svo assgoti heimtufrek - því að mér þótti samt gaman á sýningunni. Ég efast bara um að ég vakni í fyrramálið með hana í kollinum.

Hvar er annars samstaðan?

Ég tek ofan fyrir VGK og vonandi taka önnur fyrirtæki hið sama til athugunar. Auðvitað er fúlt að eldsneytisverðið hefur hækkað en ég hef ekki síður áhyggjur af aukinni mengun og meiri slysahættu.

Í gær frétti ég af stofnun sem gefur sig út fyrir að vera umhverfisvæn en sendir starfsfólk sitt í leigubíl frekar en strætó ef eitthvað er. Er það tíminn sem verið er að spara? Er það leigubílastarfsemin sem verið er að styðja (mér finnast þær almenningssamgöngur líka mikilvægar)?

Við megum ekki fljóta um sofandi, við berum sjálf ábyrgð - og VGK skilur það.

Starfsmenn ferðist ekki einir í bíl

Sálfræði auglýsinganna virkar ekki á mig

Væntanlega halda margir því fram að þeim takist að leiða auglýsingar hjá sér. Ég held því sannarlega fram. Þó veit ég að sumar þeirra hafa neikvæð áhrif á mig.

Ég myndi t.d. ekki skipta við Remax ef ég kæmist hjá því. Allt jaríjaríið um áramótin var neikvæð upplifun. Þegar ég las síðan um eigandann sem er að láta byggja 800 fermetra einbýlishús fyrir sig sannfærðist ég frekar. Sú frétt var á við fínustu neikvæða auglýsingu.

Kaupþing skorar mjög magurt. Reyndar finnst mér vanta mjög á almenna og almennilega samkeppni á bankamarkaði en að sinni get ég unað við sparisjóðinn. Þó hlakka ég mikið til þegar vextir verða orðnir mannsæmandi og mönnum bjóðandi. Það gerist áður en ég hrekk upp af og þá njóta þess næstu kynslóðir. Maður verður að hugsa stórt.

Renningarnir á blogginu trufla mig ekki nema þegar þeim fylgir hljóð. Það var um tíma á fasteignavefnum. Sem betur fer hætti sá auglýsandi að hefta.

Aðalauglýsingarnar eru í blöðunum. Og nú get ég staðið við fullyrðinguna í fyrirsögninni. Ég veit aldrei hvað verið er að auglýsa. Stundum finnst mér það m.a.s. frekar fúlt því að einstaka auglýsingar hafa upplýsingagildi sem ég kann að meta. Mig langaði að sjá hvaða 100 konur auglýstu eftir stjórnarformennsku um daginn en þar sem ég les næstum aldrei hægri síðuna í framhluta blaðanna fór ég á mis við þær upplýsingar.

Ég hugsa að svona sé komið fyrir fleirum. Ef auglýsendur læsu þessa hugleiðingu mættu þeir vel velta fyrir sér hvort markaðssetningin er ekki svolítið farin út um gluggann.

Besta auglýsingin er alltaf ánægður kúnni.

Orðsporið rokkar.

Órugluð Stöð 2 í augnablikinu

Ég hnaut rétt í þessu um óruglaðan þátt á Stöð 2, 60 mínútur (eða Klukkustund eins og við Sigurður G. Tómasson á Útvarpi Sögu myndum kalla þáttinn ef við fjölluðum um hann). Í honum er verið að fjalla um fasteignamarkað og hrun á honum í einhverjum fylkjum Bandaríkjanna.

Fólk fékk óvandaða ráðgjöf frá fasteignasölum og bönkum, fjárfesti langt yfir getu sinni og sat svo í súpunni. Hvenær fáum við fréttaskýringaþátt af þessu tagi hér?

Fasteignavefur Moggans

Ég er nokkuð reglulegur gestur á fasteignavefnum og finnst gott að geta leitað eftir hverfum, stærð, verði og götuheiti - en af hverju get ég ekki sett í leitarskilyrðin svalir eða verönd? Sólarsvalir skipta mig miklu máli.

Af hverju skrifa fasteignasalar jarðhæð þegar íbúðin er svo niðurgrafin að það þarf næstum stól til að sjá til sólar? Við sáum þekkta íbúð í gær sem er algjör kjallari, og ekkert að því, en hún var auglýst jarðhæð.

Myndir sem eru svo góðar að íbúðir virðast stækka um helming hrinda mér frá á staðnum. Dugar trikkið á aðra, bara að fólk sé komið á staðinn?

Og það síðasta sem mér liggur á hjarta núna er: Af hverju auglýsir ekki fasteignavefurinn hvar er opið hús? Stundum hef ég séð forvitnilega eign sem ég veit að á að sýna í opnu húsi en man ekki hvenær og man heldur ekki alveg hvaða eign. Af hverju getur maður ekki flett eftir þessu leitarskilyrði? Mér leiðist ekkert meira en að sýna mína eigin eign og næstmest leiðist mér að skoða hjá seljendum sjálfum (jæja, kannski ekki næstmest). Ef ég hef áhuga á íbúð vil ég geta skoðað hana þegar seljandinn er að heiman og helst þegar gert er ráð fyrir gestagangi hvort eð er.

Ég man alveg þá tíð þegar maður þurfti að fletta blöðunum í leit að réttu eigninni og er fjarska þakklát fyrir fasteignavefinn, hehhe, kæri Moggi, en er ekki alltaf verið að þróa vefina? Þetta hlýtur að verða næst.

Klukkan er að verða hálfellefu og Fréttablaðið er ekki einu sinni komið með auglýsingarnar ...

Dásemdir netsins

Svo mikið hafði ég heyrt um Kastljós fimmtudagsins sem ég missti af að það var augljóst að ég yrði að horfa. Nú er ég búin að sjá bæði Svandísi og Vilhjálm bera í bætifláka fyrir REI og verð viðræðuhæfari á mannamótum.

En skyldi verða niðurstaða í málinu? Eða deyr það drottni sínum?

MA - FSu

Varla þarf að minna nokkurn mann á Gettu betur sem verður í sjónvarpinu í kvöld, er það nokkuð? Í mínum augum er þetta SJÓNVARPSEFNIÐ og það verður mikið hrópað og kallað í kringum mig (svolítið til að bæta upp á skort á stuðningsmönnum liðanna sjálfra). Þetta ... og safnanótt Vetrarhátíðar er heila málið í óveðri suðvesturhornsins.

Koma svo!

34,64% kosningaþátttaka - viðvarandi áhugaleysi

Við hreykjum okkur af mikilli og lýðræðislegri þátttöku í kosningum á Íslandi. Nemar eru stór hópur sem hefur mikilla hagsmuna að gæta. Þetta þátttökuhlutfall er svo sem ekki nýtt í háskólakosningum, en hvað veldur? Höfum við það of gott? Eru fylkingarnar of einsleitar? Nógu vel eru þær kynntar, greinaskrif í dagblöðum í aðdraganda kosninga og hvaðeina.

Eru allir hamingjusamir með aðganginn að námslánum? Draga Röskva og Vaka kannski hvort eð er ekki þann vagn?

Maður hlýtur að spekúlera.  

Röskva sigraði naumlega

Clinton er minn maður miðað við spurningalista

Ef Egill Helgason villtist aftur inn á síðuna mína gæti það ljós runnið upp fyrir honum að ég notast við ýmislegt af síðunni hans. Eftir að hann setti sig niður á Eyjunni fór ég að lesa hann reglulega, ekki meðan hann var á Vísi. Veit ekki af hverju.

Núna rakst ég á spurningalista um hvaða frambjóðandi væri frambjóðandi manns. Ég þykist alltaf vera vel slarkfær í ensku, en þó var þarna snúin spurning (kannski tvær) sem getur vel vafist fyrir íslenskum lesendum. Ég hallast að því að skilningur minn hafi verið ágætur því að Hillary Clinton fékk besta útkomu hjá mér, 53 stig. Næstur var Barack Hussein Obama með 48, svo þessi Mike Gravel  (37) sem Egill valdi, sér að óvörum. Mitt Romney var næstur með 16 stig (er hann ekki ógurlega spenntur fyrir fósturvísum?), þá John McCain með 16, Mike Huckabee með 15, Ron Paul (14).

Verst að mega ekki kjósa þarna vestur frá.

Myndasíða af húsunum við Laugaveginn sem má rífa

Ég rakst á þessa ágætu myndasíðu af húsunum sem heimilt er að rífa. Mörg eru krúttleg þótt erfitt kunni að vera að komast inn í sum þeirra á hjólastól eða með barnavagn. Það verður forvitnilegt að fylgjast með stefnumótun til lengri eða skemmri framtíðar á komandi vikum og mánuðum.

Mig furðar ekki að Leifsstöð sé sprungin

Það er jafn dapurlegt fyrir það. Það er aðeins 21 ár síðan Leifsstöð var reist og átti þá væntanlega að standa fyrir sínu til langrar framtíðar. Við sem erum með annan fótinn hjá Leifi við að taka á móti farþegum vitum að það hefur verið hundleiðinlegt ástand undanfarið, allt síðasta ár í minningunni. 

En hvernig væri að bæta innanlandsfluginu við, hætta bútasaumnum, stækka þess í stað myndarlega, hafa útgöngudyrnar í vari fyrir vindinum og bæta almenningssamgöngurnar við höfuðborgarsvæðið? 

Leifsstöð sprungin

330 blaðsíður með engum svefnhléum

Sjálf náði ég ekki að lesa Þúsund bjartar sólir í einni lotu. Samt hlýt ég að mæla með því að lesandinn láti ekki hégómlegt daglegt smástreð trufla einbeitinguna.

Einn er harmleikur, þúsund er tölfræði - það er segin saga. Og þótt maður sjái í dagblöðum að ósanngjarnir menn breyti ranglega, brjóti menningarverðmæti og lúberji fólk, limlesti og drepi, svívirði og hrakyrði verður það sjaldnast meira en frétt. Og þótt persónurnar Mariam og Laila, Jalil, Rasheed og Tariq, Aziza og Zalmai séu skáldskapur lifna þær miklu fremur en sannar manneskjur í stuttri blaðagrein.

Já, þetta sér hver maður.

Einhverra hluta vegna var ég ekki svona hrifin af Flugdrekahlauparanum. Þótt ég þykist bærilega góð í ensku dettur mér í hug að það sé að einhverju leyti vegna þess að ég las hana ekki á móðurmáli mínu. Ég ætti kannski að lesa þýðinguna og vita hvað mér finnst.

Heildræn tjáhvarfasýki, veðurgremjuröskun, spaugröskunarheilkenni, þetta reddast-röskun og starfslokaoflæti

Þemað svínvirkaði í Spaugstofunni. Gestaleikarinn Jóhann G. Jóhannsson var líka frábær, ekki síst þegar hann reyndi að tala Þorgeir Ljósvetningagoða undan feldinum og nýta sér starfslokaoflæti Sigtryggs.

Að þeim skuli takast þetta á svona stuttum tíma er nánast óskiljanlegt. Ég sé ekki eftir þessum peningum. Hvað kostar þetta annars ... í samanburði við eitthvað annað?

Hvernig eignir seldust? Og hvenær voru þær seldar ef þeim var þinglýst í síðustu viku?

Mér finnst svo mörgum spurningum ósvarað um fasteignamarkaðinn.

Ég hef heyrt því fleygt að byggingaverktakar kaupi hver af öðrum til að halda veltutölunum uppi. Kostar það þá ekki pening ef satt er? Ætli eitthvað sé til í þessu? Ég hef líka heyrt að það taki stundum mánuði að ljúka sölu með þinglýsingu. Eru þá núna margar vikur síðan kólnunin hófst? Ætla bankarnir aftur að fara að lána? Halda þeir tímabundið að sér höndum vegna nýbygginga? Er þeim stætt á að standa ekki við loforð til venjulegs fólks sem hefur ætlað að fjármagna eigin húsbyggingu með bankalánum? Voru það kannski engin loforð, trúði fólk því bara í grandaleysi? Hvernig ætlar t.d. Landsbanki sem græddi 40 milljarða á síðasta ári (eða voru þeir 60?) að láta viðskiptavinina njóta þess?

Langar blaðamenn ekki að vita þetta? Langar blaðamenn ekki að miðla svörum til lesenda?

Í sumum öðrum löndum er núna mikil niðursveifla á fasteignamarkaði. Eru einhver teikn um að það gerist hér? Eða má bara segja frá því eftir á?

Eina fólkið sem blaðamenn spyrja er fasteignasalar og starfsmenn greiningardeilda bankanna. Þrátt fyrir ágæti þess fólks trúi ég bara ekki alveg því sem það segir. Eru hvergi til sjálfstætt starfandi hagsögufræðingar? Trúverðugir.

Fasteignakaupsamningum fækkar

Skemmtileg myndabók

Ég eignaðist myndabók í kvöld sem ég hef blaðað í síðasta klukkutímann eða svo. Gamall samháskælingur minn og bloggvinur, Sigurgeir Orri, á hluta af heiðri kápunnar. Sá heiður er mikill því að kápan er firnaflott. Ég gratúlera, Orri.

Og bókin - skemmtilesning sem ég hefði viljað setja kommupúkann á. Myndirnar tala og tala og tala ... hins vegar. Myndefnið til 60 ára er auðþekkjanlegt allan tímann.

Ég er að reyna að tala í gátum en held að þær séu of auðleystar samt.

Leiklistardómar(ar)

Nú mætti rota mig með fjöðurstaf. Í þremur blöðum eru í dag dómar um Höllu og Kára sem ég sá á sunnudag. Sýningin olli mér vonbrigðum, einkum fyrir að vera klisjukennd og laus við nýstárleika. Þá meina ég fyrst og fremst handritið. Ég get vel fallist á að leikurinn hafi verið nokkuð góður og einkum var gaman að sjá til Vigdísar Hrefnu Pálsdóttur sem ég komst að í dag að væri dóttir Páls Baldvins Baldvinssonar.

Tveir af þremur dómurum eru mjög hrifnir af stykkinu og þá held ég að þau hljóti að hafa verið á annarri leiksýningu en ég. Á minni sýningu var Jón Valur Jónsson og við vorum grátlega sammála um skort á gæðum. Ef elsku Hafnarfjarðarleikhúsið sem hefur í áranna rás átt stórkostlega - og nýstárlega - spretti, t.d. ógleymanlegt Himnaríki, Sellófan, Síðasta bæinn í dalnum, ætlar að gera sér vonir um frekari styrki þarf það að taka sig á. Sessunautar mínir voru sammála mér, ætli bara við höfum séð í gegnum klisjurnar um neysluhyggjuna, sjónvarpssölumanninn, fátæka þjófinn og draumsýn útlendinga?

Ég vona að enginn komi með fjöðurstafinn og slái mig í hausinn, ég á svo margt ógert í kvöld.

Hive eða jarðstrengur

Heimasíminn var að heiman í alla nótt. Netið var líka í dvala í alla nótt. Skyldi það vera Hive að kenna eða hjó einhver með skóflu heimtaugina mína í sundur kl. 23:03 í gærkvöldi og tjaslaði saman kl. 8:30 í morgun?

Hvað segir Ásinn? Er tímabært að skipta yfir í Vodafone?

Smekkur verður ekki endilega rökstuddur

Í trausti þess að aðeins Ásinn og e.t.v. Tvisturinn lesi þessa færslu ætla ég að opinbera smekk minn fyrir Spaugstofunni. Hann hefur verið mikill, ég missi ógjarnan af þætti. Það breyttist ekki eftir áhorf síðasta þáttar. Mér þótti að sönnu togna á hnífasettabrandaranum, en Spaugstofan gerir út á ystu nöfina. Þá sjaldan Spaugstofan hefur verið með þemu, eins og geim-eitthvað eða Richard Attenborough (homo islandicus), hefur mig tekið að syfja.

Mér finnst alveg magnað hvað '89 af stöðinni eins og Spaugstofan hét í árdaga hefur elst vel, hvað þessir gaurar sem nú eru að sönnu orðnir miðaldra ná að halda dampi, viðhalda ástríðunni og hafa gaman af þessu.

Ég er aðdáandi og þarf svo sem ekki að rökstyðja það.

 

Nú er illt í efni - auðkennislykillinn gaf upp öndina

Ég hef ekki komið fram við auðkennislykilinn öðruvísi en af stakri kurteisi og elskulegheitum. Fyrir allnokkru datt endinn af þannig að ég brá teygju um stykkið allt til að endinn (hulsan) tapaðist ekki. Áðan skráði ég mig svo inn í heimabanka með fulltingi númers úr lyklinum. Korteri síðar var lykillinn allur.

Og það þori ég að hengja mig í hæsta gálga upp á að fleiri hafa sömu sögu að segja. Hvernig fer ég nú að?